大除夕０７’

　　今日係２００７年１２月３１號，即係今年嘅最後一日，亦即係大家所認知嘅大除夕。

　　最近都無行好耐，見今日無乜特別要趕返去嘅理由，所以再一次展開我嘅「苦行」。

　　不過今日天氣超凍，天文台仲發出今年嘅第一個寒冷警告～～喺今年嘅最後一日，發出咗今年第一個警告！

　　但係我就一於懶理，仍然大無畏咁响寒冷警告底下向尖沙咀方向行！

　　行到去差唔多佐敦，我「凍」嘅感覺都已經一掃而空！

　　去到尖沙咀碼頭，如常咁攞咗份「都市日報」，跟住就去搭船喇！

　　講真，今日著實無乜 mood 做嘢，所以返到公司，即刻同老闆攞咗下晝 time-off ！

　　今晚一於一齊迎接２００８！

唉！瘋！

　　今朝再一次無行，唔係因為啲乜，只係為咗部新電話～ Apple iPhone ！

　　個朋友上星期六喺美國帶返嚟，我玩咗幾日，但係因為新得滯，所以電話嗰部分仲未解到鎖（所有新買嘅 iPhone 因為 Bootloader 係 4.6 嘅關係～即係所謂內置嘅 Firmware 係 Version 1.1.2 ）！無計底下，唯有當係 iPod Touch 用住先！

　　尋晚放工，終於疊埋心水，去咗先達買咗張叫 TurboSIM 嘅 IC Card ，話新機都可以用得到所有功能。

　　返到屋企，部爛鬼電腦唔生性，壞鬼咗，搞到我部新玩具唔上唔落！

　　無計，唯一方法係返公司用公司部電腦！

　　就係咁，今朝超早起身，超早出門口，超早返到公司！

　　從來未試過！ 7:45AM ！真係拜神都無咁神心！

　　返到公司，當然係無人啦！正！可以靜靜咁搞我部 iPhone ！

　　不過，搞到而家成十一點（當然中途有做吓公司嘢），都係仲未得！

　　唉！瘋！真係搞到人都癲！

　　最多今晚再去先達，補多兩舊搵人搞！

　　但係，真係唔忿氣！好！整多次唔得先算！

　　繼續努力！

聖誕之後．．．

　　三日前嘅平安夜，係繼續要返工嘅日子。仲記得當日，眼見同事們一個一個咁喺我面前離開，最後仲要得返我一個人無得早走，嗰種辛酸，非筆墨所能形容！終於等到放工，先叫做有返少少嘅安慰，叫做有放假嘅心情！不過而家，我又要返到公司開始沉悶嘅工作，個同事仲要放埋假．．．唉！嚟緊幾日，真係不敢想像！！！

　　尋日難得約齊人腳，終於可以行到山，所以選擇咗一條比較長嘅路線，詳情會喺【外傳】交代。

　　行完山嘅今朝，隻腳好似「死咗」咁，都唔知係因為太耐無行，定係真係自己老咗！

　　無可奈何之下，決定再一次違反「苦行」手則，去咗搭巴士再轉船！

　　不過喺等巴士其間，見對面線有一架私家車同的士撞咗；本來都唔係真係話好大件事．．．起碼無人受傷先！不過，個場面就真係超墟堪！！！

　　撞車只係涉及兩車嘅司機，無其他乘客；但係處理呢件事嘅警察，就超過十個！！！

　　而車輛就有兩架撞咗嘅車、一架衝鋒車、同埋一堆警隊嘅電單車．．．而中途仲繼續有電單車加入．．．咁當然唔係普通嘅電單車啦！

　　其他人就唔知，我就真係睇到「Ｒ」晒頭喇！

　　我當兩個騎警一對一咁同兩位「當事人」落口供，一個負責交通疏導，衝鋒車（當有５個警察先）要控制情況，再加多一個騎警執頭執尾兼做聯絡，咁都係頂到盡九個警察啫！我真係唔明第十個打後嗰啲喺度做乜？？？

　　睇睇吓，巴士到站，我就帶住我嘅疑問上車；從此，呢個疑問變成一個．．．謎！！！

一個濕笠笠嘅早上

　　尋晚出完街送女友搭車嘅時候，失驚無神落起雨上嚟。諗住呢啲咁嘅「失暈雨」第二朝會無o架啦！哈！點知今朝一早起身，聽到個冷氣機喺度「叮叮咚咚」咁響；再望出條街．．．唉！仲係落緊雨添！！！！

　　一如以往，我繼續起身擦牙洗面飲鮮奶（高鈣低脂嗰隻），見仲有少少時間，就開電腦搞吓部新買嘅 iPhone ．．．特登「磨」多一陣，諗住會無雨啦！點知仲係見啲人担緊遮，又見個鐘都成七點四個幾字；另一方面，個 iPhone 好似比想像中難搞，於是我就下定決心，換好衫走人！

　　落到街，見啲人仲係担住把遮，但其實當其時只係得啲雨粉，應該係開始停雨無耐。我見個天又唔係咁光，又唔知佢會唔會突然傾盤大雨，咁我咪下定決心，要去搭 103 巴士囉！

　　未到個站嘅時候，遠距離望都有架 103 ，oh no！！！我仲未過馬路．．．等埋呀．．．．

　　咁當然架車唔會等我啦！咁我就唯有垂頭喪氣咁埋去等囉！

　　好彩，原來朝早嘅 103 都 OK 密o架！我等咗大概 5 分鐘度，我就可以上車啦！

　　八點三未到，我就返到公司；跟住，我就要同部 iPhone 搏鬥喇！

　　有關部 iPhone ，有幸嘅話，我會响【外傳】詳述，請密切留意！

無奈

　　而家已經係夜晚嘅九點五十三分，離我今朝「應該」苦行嘅時間已經過咗成十幾個鐘喇！咁點解會咁夜先至嚟呢度寫嘢呢？當然係因為今日嘅工作超多啦！話實，真係差啲做死咁滯！

　　講返今朝，又點解會話「『應該』苦行」呢？咁當然係我今日無行度啦！

　　其實，主要係因為我晏晝會無飯食（熟識我嘅朋友就知我平日食晏晝飯係响公司啲阿姐度搭食嘅！真係慳好多o架！！！而今次無飯食係因為所有阿姐今日有聚餐），所以我係「有預謀地」早一晚就約同事喇！去邊？咪去蓮香飲茶囉！

　　講到飲茶，我今次係第三次喇！而對上兩次食嘅雖然唔多，但係就可以頂到一日！

　　亦好彩我今朝有咁嘅舉動，唔係好似今日咁繁忙，做到死咁，就真係好唔抵啦！！！！話晒，朝早都叫做「他調」過吖！

　　最後，我就好正式咁同大家講一句：苦行日記，是日休息！！！！

又有新遊輪

　　今朝如常咁去搭天星小輪，望出個海度，見都架「寶瓶星號」啱啱返緊嚟。佢喺維港中心，就好似一隻龐然巨物咁，向住海運大廈方向進發。

　　而佢嘅「姊妹」遊輪～「雙魚星號」，就一早已經泊咗埋岸喇！

　　同一時間，我發然另一隻遊輪係我未見過嘅！就係下面呢架喇！



　　突然間，我個腦浮現咗一個問題：究竟香港每個月有幾多外地遊輪入境呢？淨係呢個月，我已經見到成三隻咁多～～咁，又會有幾多遊客入境呢？

　　跟住，我所諗嘅嘢再高多咗一層：如果我係遊客，去到人哋嘅地方，又會點呢？又如果我要從海出發，又去邊豎好呢？

　　最後，我嘅問題一再提昇，直頭到咗極點：究竟，我幾時先可以放假同埋有錢去旅行呢？？？．．．．．

　　之後，隻天星小輪就埋咗岸喇！忙碌嘅一日，咁就開始咗喇！

昏迷

　　今朝大概六點半，個鬧鐘好有責任咁係度響，但係我就好似完全無瞓過覺咁，連眼都唔係好擘得大！好彩我較咗兩個鬧鐘，而佢哋都係嗰啲唔按啱嗰個掣就會每隔五分鐘響一次，所以我就選擇繼續瞓～～唔係，應該係我根本起唔到身，個身體完全唔受我控制咁～～終於到咗六點十，我可以控制返自己個身體喇！

　　不過，我由擦牙到洗面，都係好似隻手「自動化」咁；到我換埋衫褲鞋襪，飲杯奶就出咗門口喇！

　　到咗條街之後，覺得自己又再開始不受控制，所以去咗搭巴士喇！一上到車，二話不說上咗上層搵咗個位即刻瞓，途中雖然係瞓唔「霖」，不過真係無醒過！跟住去搭天星小輪上層（貪佢朝早無乜人），就見到海運大廈停泊咗隻遊輪未見過：

　　隻船就無乜特別，不過因為未見過，同埋俾佢個名吸引咗！！ ScholarSHIP 喎！有邊個讀書嘅時候唔想要呀？而家唔怕啦！以前無攞過 scholarship 嘅話，而家都可以坐返夠本；不過大前題係：你要好有米！！！

　　雖然有隻咁過癮嘅船，但係我「昏迷」嘅感覺一啲都無減退，反而有所增加！！！咁我咪「發行對腳」，高速咁返到公司，都係八點半未夠。好！一於眠一眠先．．．就係咁，我就正式進入昏迷狀態．．．直到九點半，昏迷感覺漸漸消散，先至開始今日嘅工作！！！

耐人尋味

　　大家有無睇過「老夫子」？講真，我覺得老夫子同埋牛仔係香港漫畫史上最具代表性嘅人物！（真係要多謝王澤同埋王司馬兩位老師！）

　　點解無啦啦講老夫子？心水清嘅你同埋妳一定會估到同今日個題目有關喇！

　　「耐人尋味」，的確係「老夫子」入面用得最多嘅題目。適逢其會，今日嘅我的確係比較耐人尋味．．．

　　最耐人尋味嘅，就係起身嗰下！當我擘大對眼之際，一望．．．嘩！七點半啦！！！

　　好耐人尋味咁諗返之前一晚，同朋友食飯（仲要收到炸彈俾佢炸到遍體鱗傷添．．．個荷苞）；席間同朋友暢飲，然後就「wing」住返屋企喇！跟住發生乜嘢事，都唔係好記得添！

　　諗完一輪之後，就「喳喳臨」起身擦牙洗面換衫換褲飲杯奶再孭袋走人，已經成八點．．．呢個時候，我個腦又好耐人尋味咁出現咗一句：今日苦行告吹！

　　最後，我就耐人尋味咁行去新世紀「嘟」兩蚊再行去旺角站搭港鐵返工喇！

ZzzZzzZzzZzzZzzzzzzz......

　　尋晚做冬，叫埋女友嚟屋企食飯，之後行咗一陣街，再送佢走。返到屋企，過咗半夜，寫埋個外傳之後（斷斷續續咁寫咗好耐，因為部電腦瓜瓜哋，無計），都成兩點喇！「咋咋臨」瞓覺，今朝阿爸阿媽去澳門，一早起身，整裝待發之時，難免會「傾鈴鯁欄」，所以我未天光就起咗身喇（大概六點四、五度啦）！

　　正因為咁，我而家個腦「實晒」，諗唔到嘢；唯有用相片代替，最多加少少描述，敬請原諒！

今朝嘅維港同我一樣，都係矇矇矓矓


呢隻就係我成日搭嘅天星小輪喇！想開船之際，咁啱雙魚星號歸航，所以要讓一讓喇！

嘩！好快呀！唔知阿爸阿媽係咪喺呢隻船上面呢？？

啲漁民真係好勤力，但係茫茫大海裡面，佢哋淨係得隻艇仔，真係戥佢「牙煙」！

就好似圖中所示，上面係維港經常見到，其中四棟唔同年代嘅摩天大樓，由左至右分別係：中環怡和大廈、中環中銀大廈、灣仔中環廣場、中環國際金融中心（二期）

期待的一天

　　可能因為尋日好早起身，今朝唔覺唔覺，我六點幾就醒咗喇！講真，尋晚瞓得唔係幾好，成日醒，都唔知做乜！！

　　不過今朝一出門口，感覺超爽．．．我諗係因為今日係星期五啩，期待咗四日,終於來臨,所以心情特別輕鬆！

　　由屋企行出太平道，再到窩打老道嘅時候，望望個鐘，嘩！成七點半o架啦！之後，忽發奇想：橫掂都未試過搭巴士返工，不如今日試吓啦！順便睇吓要幾耐時間吖嘛！於是就向住紅綠燈進發，過對面馬路等 103 號巴士喇！

　　其實，搭 103 有一個唔好處，就係無機會攞免費報紙．．．不過，好多時都係攞咗返去擺足成日，到返屋企先有機會睇返，而屋企人朝早又會攞喎；所以，無攞一日半日，無所謂啦！

　　等到七點八，巴士終於到喇！徐徐咁上咗車之後，我就周圍望吓．．．架車行到去衛理道嘅時候，我見到有一系列大概六、七個女學生，企咗响路邊，望住同一個方向，心諗：哦！佢哋等緊巴士啫！跟住，我再望清楚啲，咦！嗰度無巴士站o架喎！咁佢哋等乜呀？？？

　　啱啱我嗰架巴士响對面埋站，所以我可以「參詳」多一陣。一路留意住佢哋，想睇吓佢哋等乜之際，突然間，佢哋向住同一個方向行過去；我再望望佢哋行去邊架車上車啦，哈！佢哋一路行一路行，行過晒啲車都未有停落嚟嘅意向！呢個時後，我架巴士上完客要開車喇，我就望住佢哋繼續行，我就絕塵而去，不帶走一片雲彩，只係留低一堆疑團！！！

　　既然係疑團，我都費事繼續諗喇！跟住我攞部 NDS 出嚟，玩玩吓又過咗海底隧道，再無耐就到香港公園花園道出口個站喇！我落車嘅時後，都只不過係八點二咋！

　　本來諗緊好唔好行去攞報紙嘅，不過諗深一層，都係早啲返嚟，寫埋個 Blog ，同大家報告一下先啦！

爽朗的一天

　　早兩日咪去過蓮香飲早茶嘅！！跟同事講完之後，佢果然超大興趣，興緻勃勃咁猛問我幾時再去．．．我禁唔住佢嘅「纏繞」，今朝就同佢一齊去咗飲早茶喇！

　　不過，正如我上一次咁講，因為今日無苦行到，所以我都係唔喺呢度講咁多今朝嘅嘢啦，如果唔係，就會同我呢度最初嘅原意「背道而馳」得好緊要！大家唔介意嘅話，不如去我個「外傳」望一望，我會喺嗰度講，仲會有相睇添！

輕鬆的一天

　　辛勞過後，充分嘅休息係必然嘅！尋晚比較早瞓，所以今朝都算得話幾精神。

　　一早出門口，步伐輕鬆。可能無晒嗰啲工作上無形嘅壓力啦，所以今朝心情都幾 OK ！但係，同尋日一樣，一路行都唔覺有啲乜嘢特別值得記低．．．不自覺開始有少少灰．．．

　　行到去九龍公園，一樣見班老人家响豎耍太極，亦一樣見啲白鴿响豎周圍食，日日如是．．．

　　突然間，望過去個水池度，見到有隻天鵝，黑頸白身，毛色非常美麗！見佢好輕鬆咁游游吓，感覺超正！

　　游到去池邊，明顯佢想上岸。可能個「岸」太高，見佢好吃力先「爬」上到岸．．．無錯，佢係「爬」上岸，就好似啲蛇咁，先先伸個頭上岸，再將身體盡量「挨」前，最後用個肚嚟爬吓爬吓，咁就上咗岸喇！

　　佢上咗岸之後，就拍翼去整乾個身，之後就猛咁用個頭去「捽」自己個肚（見左圖），志在要捽走啲水點。望住佢係咁捽係咁捽，再諗返先頭佢爬上嚟個情境同佢個樣，真係好搞笑！ 捽咗好耐好耐，終於都乾晒喇！於是就可以起行喇！睇吓佢幾靚仔／女！（唔知係仔定女呢？？）

辛勞的一天

　　唔經唔覺，又到咗六點幾啦！．．．咁早？？？唔係朝早六點幾，而係黃昏六點幾喎！！！

　　尋日先過完精神嘅一日，估唔到今日會咁相反！

　　一早 schedule 咗今日有 job 要做，但係總係覺得唔係好「聚財」，成朝都係憂心忡忡，唔知點算咁．．．另一方面，今朝一路行，一路望，都唔覺有乜嘢特別好寫，係唯一見到有個女仔（我估大概十幾歲度啦！），佢一路行，一路玩自己後面條馬尾．．．有乜特別，咪就係佢條馬尾竟然長到過咗個 pat pat ！！

　　本來想話影低佢，但見佢成家人一切，著晒運動衫褲喺到晨運咁，其中個（懷疑）老豆仲好好打咁款，所以咪唔敢影囉！

　　無影到佢哋，咪影吓其他嘢囉！下面嗰啲就係我今日嘅作品！


朝早晨運，唔知會係點嘅呢？

九龍公園有個彩色花圃，雖然唔講得上話好絕色，但係都算係幾靚，尤其朝早一望到，倍感心曠神怡！

　　寫到呢到，都係時候要休息一下喇！要放工喇！聽日再見啦！

精神的一天

　　經過多日嘅休息（其實無話好多日，不過都總算係休息過），今日又要返工喇！

　　一直有一樣嘢想試，但係會同「苦行」背道而馳，所以一路都無乜機會去試！不過，趁住今朝心情唔錯，又鬼咁早就起咗身兼出埋門口，把心一橫，就決定今日一改方向，唔行而去搭港鐵喇！

　　簡單一句，今日無行到，仲無去新世紀「嘟」兩蚊就去搭港鐵，而且去埋食早餐添！

　　去咗邊？？因為係「背道而馳」，所以都係留返喺「外傳」度講啦！

※ ※ ※ 放 假 預 示 ※ ※ ※

敬啟者：

　　小弟因有要事（好似話要試啲唔知乜嘢衫，話要年半後用），於明、後兩日放假（即係12月6至7日），『苦行日記』將暫停營業兩天，不便之處，實屬遺憾。

　　若然　閣下有感「唔係好聚財」又或者「唔係好慣」，可以轉移玉步，到小弟的『苦行日記【外傳】』，一睹小弟於苦行以外一切新奇趣怪之事，相信可以舒緩一番！

苦行僧　敬上
2007年12月5日　晚上　天朗氣清

又請飲茶．．．

　　尋晚有事，所以好夜先瞓．．．今朝一起身，望吓個鐘．．．嘩！成七點半啦！！足足遲咗成粒鐘！！「喳喳琳」擦牙洗面，跟手出門口，都已經八點喇！喺無辦法之下，唯有做一日「衰仔」，走去搭地鐵．．．呀！應該係港鐵先啱！

　　搭得港鐵，都係要以慳為主，所以去咗新世紀廣場「嘟一嘟」平兩蚊！去到商場門口，哈！又見到「淳茶舍」喺度請人飲茶！好似尋日咁，我秉承咗一貫香港人嘅良好習慣，走咗去排隊囉！排我前面個婆婆，仲排完又排添，不過第二持就已經俾人發現咗，所以最後都係得番一支。以下，就係我今日攞到嘅「冷翠玉露」喇！


※專登影返同一角度，等大家睇吓同尋日有乜唔同？※
　　攞完茶，再去「嘟一嘟」，跟住就去搭港鐵。由旺角去中環，用八達通一直都係收開十蚊，嘟完就八蚊．．．但係，今日出閘之時，望一望個銀碼，竟然只係收七個半！！！今日總算係「苦行失敗」之中，一點點嘅驚喜！

【特輯】
　　無意間係網上搵到下面段片。雖然無林嘉欣排茶俾我，不過睇吓佢個製作特輯都幾盞！

※ ※ ※ 廣 告 雜 誌 ※ ※ ※

以下係廣告雜誌一則：

　　有鑑於苦行僧之影相興趣日益濃厚，兼且有莫大嘅感想、感覺、感受要同大家分享，現特別建立另一部落格，以表其之感動、感激、感謝！誠望各「粉絲」們可繼續支持！而該部落格名稱則為：


　　以上部落格將會作不定期更新，主要係想記低「苦行」以外之人、事、物，敬請留意！

請飲茶．．．

　　今朝一路行，都唔覺有啲乜嘢特別嘢值得記低，仲諗住潦潦數句，再擺一啲尋晚影嘅相落嚟，就完成今日個 blog ；一嚟簡單之餘，又可以多啲時間用嚟休息又好、做嘢又好．．．唔講唔知，近排唔知做乜鬼，鬼死咁多嘢做，仲要鬼死咁亂．．．鬼咩，管理層失當，管理不足，指示又唔清唔楚．．．落到嚟我哋呢啲細嘅，咪做到隻積咁囉！

　　講返今朝，唔知大家記唔記得尋日「淳茶舍」响尖沙咀碼頭請飲茶呢？哈哈，正喺我煩惱緊今朝無嘢寫之際，就俾我撞正原來今日輪到中環．．．我見唔駛排隊，咁我作為一個典型嘅香港人，我當然唔執輸啦！以下就係「淳茶舍」請我飲嘅「無糖烏龍茶」喇！



《維港：填海的一角》
　　另外，頭先亦提過我尋晚亦有影相，其實只係想影返填緊海嘅中環。大家一齊「集體回憶」一下！

香港百態

　　上星期六，去咗個朋友屋企，之前喺佢樓下個商場買咗啲嘢，之後臨上去嘅時候，見到咁嘅景色，忍唔住就影低咗喇！

　　嗰個藍天白雲，喺個屋村商場嘅窗仔望出去，特別有意思；而且，個天咁藍，望吓望吓，令人舒暢；唔怪之得個婆婆都望到定晒形啦！

　　講返今朝，隻腳有啲痛．．．知情人士可以唔駛擔心，唔係我嘅舊患發作，而係攰嗰隻痛。所以決定改搭巴士轉船，懶番一日！

　　去到尖沙咀，見到隻豪華郵輪拍緊岸，就影低俾大家睇喇！當時係大約上午唔夠八點。 不過，我見到有隻船（有時有兩隻添）朝朝都跟住隻大郵輪（見左圖）。我諗咗好耐我都諗唔到係乜嘢船！最初估係咪「收夜香」，但後期又覺得唔係好似。唔啱大家又估吓吖！

　　望完船，想話轉身去攞報紙，之後再搭上征途．．．突然間，發覺唔知由邊度開始多咗條人龍！追索源頭，原來係「淳茶舍」喺度「請飲茶」．．．最衰唔係林嘉欣喺度派，如果唔係，我一定埋去排隊之餘，再同佢影多好多好多張相添！不過，就算林嘉欣無嚟到，都吸引唔少香港人．．．大家望真啲，就連派報紙嘅「姐姐」都唔執輸去排埋一份添！

早晨！尖東！

《序：影夜景》

　　尋晚特登約o左同事一齊去影相，諗住影o下o的燈飾，不過有好多都未有，所以作品唔多，佳作更加唔好提！以下係 OK o的o既相，其中有『幻彩詠香江』添！

　　　
　　可能係意猶未盡，所以今朝忽發奇想，一改平日路程，索性走去搭火車，由旺角東去紅磡，再行尖東海旁去尖咀碼頭搭船！ o係途中遇到好多新奇趣怪o既o野，想o係度同大家分享分享，希望大家可以有愉快o既一日：

《第１站：游冬泳》

　　由紅磡火車站開始出發 ，沿住尖東海旁行，去到差唔多尖東至中環o既碼頭（即係海景嘉福、日航對面），望出個海，見今日都唔少煙霞；望望o下，突然見有個人頭載浮載沈．．．望真o的，原來係個阿叔响豎游冬泳，有圖為証！！！

　　其實，當時游緊水o既唔止得圖中o既一個，仲有一個游得太遠，覺得影o左都未必睇到，所以我先至放過佢！

《第２站：『龍』咁威》

　　離開o左「冬泳人士」之後，我繼續行，亦繼續搵影相o既主題。去到新世界中心，見到「李小龍像」，不禁肅然起勁；又諗起平日鬼死咁多人，想好好地同李小龍影張靚相都好難。所以，心血來潮就同阿「龍哥」影o左隔離張靚相啦！

　　龍哥o既威武，簡直就係高過晒對面岸o既高樓大廈啦！！！

《第３站：維港上的漁船》

　　行行o下，到o左星光大道，望出海面，覺得朝早o既維港繁忙得緊要；海上面，船o既數量，直頭可以同陸地上o既車媲美：「巨無霸」級o既豪華大遊輪、日日出發o既賭船、接載員工o既公司船、超大型o既躉船等等，當然仲有我每日都會搭o既天星小輪啦！

　　不過，最估唔到o既就係圖中o既小漁船喇！記得去西貢時，o係碼頭度見過有好多同類型o既船，但o係維港上面就真係第一次見啦！而且，原來朝早o既維港係有好多呢o的漁船仔四圍走添！

　　適逢其會，o岩o岩望到圖中o既構圖，覺得好特別．．．現代o既高樓大廈，配上幾十年前o既「漁港風情」，其中奇妙o既感覺，比得上【清明上河圖】！！！

《第４站：早上的文化中心與鐘樓》

　　「西九文化區」正被談論之際，我o地不防o黎睇一睇朝早o既尖沙咀文化歷史區－－香港文化中心同埋尖沙咀鐘樓。

　　平時多數都係夜晚先會o黎開呢頭，而且遊客眾多，周圍都係人！但係朝早又係另一面！大家一切o黎享受一下「寧靜的文化」啦！

《後記：日與夜》

　　呢一刻已經係黃昏o既六點半。今日o既「苦行日記」，我係用足一日時間去寫，因為感想繁多，而且「相」亦都好多，要o係咁多相片當中揀選出o黎同大家分享，都唔容易！不過，最「罪魁禍首」o既，都係o個o的煩忙o既工作（仲同阿頭拗o左一輪添），令到我唔可以好快咁同大家分享我「苦行」o既感受。為o左補償，再為大家送上幾張相，睇o下香港o既日與夜！

早餐？午餐？晚餐？

　　今朝一早有開始「苦行」，諗住睇下有乜可以講下，所以比平日「八卦」，一路行一路周圍望．．．行行下，大概去到佐敦o個頭，突然有少少頭暈，望o既o野有少少浮！

　　行到去九龍公園，想話坐低o抖下，於是乎就走去園內間「麥記」，順便食埋個早餐，精神飽滿咁繼續去行。但係，意願往往就係同現實相返o既！入到去「麥記」，望住個牌，有o的不知所措．．．行埋去櫃檯，我就問：「唔該，呢度有無早餐o架？」．．．唔好覺得奇怪，我會咁問當然有我o既原因啦！！

　　「喔！我o地呢度淨係做餐o架咋！」

　　哈哈！睇到呢度，係咪好多疑問呢！！究竟乜o野叫做『淨係做餐』呢？

　　其實，佢o既意思係淨係做普通o既『麥記餐』！即係巨無霸、麥樂雞o個o的晏晝先有o既餐！當時我就係因為睇唔到有早餐o既牌，所以我先會問一個咁o既問題！

　　「哦！」呢個係我唯一可以俾返佢o既反應。

　　無奈咁離開o左「麥記」之後，我就o係度諗：其實都幾好吖！有時想食巨無霸做早餐，呢度咪係好去處囉！不過，又有幾多人真係可以『食巨無霸做早餐』呢？唔好唔記得，o個個係一個餐，即係有薯條、汽水o個隻！以我食量咁好，我自問都食唔晒啦！不過，我相信點都一定有支持者o既，話晒都係大機構嘛！！

無奈．．．

　　今日天氣寒冷，氣溫由尋日 19℃ 驟降至 14℃ ，足足有 5℃ 之差！出到街，見到個個都著多好多衫，終於開始有冬天o既感覺！

　　其實今朝凍凍o地唔係好願起身，賴o左一陣床之後，終於戰勝！出門口前特登帶埋部相機，諗住可以影o的相擺上o黎俾大家欣賞下，但係無乜「藝術之作」，唯一一張比較特別o既係以下一張：

　　上面張相，除o左後面o的高樓大廈之外，係咪好有郊外 feel 呢？唔啱你又估下呢度係邊度吖！

　　至於今日個 topic 「無奈．．．」，其實最主要唔係講我，而係我o既一個同事！話說佢今朝遲o左起身，於是佢就打電話俾我叫我話俾 supervisor 知，而同時間都呻o左兩句，好似話佢老豆見佢今朝遲o左，但係無叫佢起身不特止，仲坐係廳度睇電視之餘，冷言冷語o左幾句添．．．詳細我都唔係好知，如果你有興趣，可以睇下佢個 Blog ，可能會有玄機都唔定呢！！！

頸痛o既成因．．．

　　望見今日個 topic ，好似寫緊「最緊要健康」咁．．．其實，我只係想講一講我自己o既感受及所搵到有關o既資料。

　　原來頸痛有好多原因，不過頸痛得o黎又頭痛，仲有時有o的頭暈o既蹟象，係同第一節及第二節頸椎有關！詳情我唔多講啦，有興趣就可以睇下我網上搵返o黎o既資料。

　　至於今日苦行有乜特別？講真，無乜特別，唯一係o係搭船o既時候，望住成個中環，突然有一種不可言諭o既感覺！正當望到中銀大廈o既時候，發現隔鄰o既長江大廈，一時間誤認為係 Citibank Tower ，於是就嘗試搵下自己做o野o既美利大廈喇！不過美利實在係o個堆高樓大廈裡面最矮o既一棟，所以搵o黎搵去都搵唔到！去到差唔多要拍岸之時，突然就發現美利o既一角．．．一時之間，又有另一種不可言諭o既感覺！講o左咁耐，其實我係想講，o個種不可言諭o既感覺，實情就係我o地平日見慣見熟o既o野，一旦有機會俾你o係另一個角度去睇o既話，就會不自覺咁o黎o架喇！

　　有時候，無論我o地對人對事，其實最好都從唔同o既角度去睇下，可能正面去睇件事（或人）你會覺得好討厭，但如果由另一角度去提睇，話唔定你會有意想不到o既o野會發現到呢！！

漫步？慢步！

　　掙扎o左兩日，亦頭痛足一個星期，最後終於發現，原來係頸痛作祟！而家雖然知道原因，但因為頸痛並唔係咁容易根治，所以唯有忍痛，仲要係 double 添（因為係頸、頭兩度都痛）！

　　好彩今朝無尋日咁痛，所以最後都決定繼續「苦行」！但有o左上星期o既經驗，今日一於慢慢行，實行「漫步人生路」，順便欣賞一下朝早o既彌敦道！

　　正因為諗住「慢步」，所以今朝特別早起，亦比平時早出門口。行到去廣華醫院o既時候，見到今日超多人o係到「輪街診」，特別係老人家，心中不禁有點兒慨嘆，心諗他日我老年時又會如何呢？而家o既我已經「周身病痛」，究竟老o左又會點呢？

　　一路行一路行，唔經唔覺又行到去九龍公園，望到有一班老人家正o係度「耍太極」，又一時覺得其實人到老年時，其實都有好多o野可以做，又無話活得咁「死」o既～～～

　　同一時間，我見到有一隻鷹好「型」咁飛過；因為我過緊橋，所以個距離同佢好近，我睇得好清楚佢個口「擔」住條樹枝～～～我估佢應該係築緊巢喇！

　　望下隻表，未到八點～～～不禁諗到好多人（可能淨係香港人）好晏都未起身，就連自己好多時都係咁（不過而家要「苦行」至脫離o左個行列），但o的雀就一大清早，不怕艱辛咁四圍飛、四圍搵o野築巢，相對o黎講就勤力得多囉！！！

　　希望我可以擁有o的雀o既精神，繼續同大家分享我o既「苦行日記」！

《失敗》Vs《失望》

　　好似從來無同大家提過，小僧素來患有「睡眠窒息症」，所以瞓覺o既時候，一向都要戴住一個「氧氣罩」咁款o既o野瞓，用意係將氣管擴大，就好似個氣泵咁，不停為我打氣！

　　咁o岩得咁「橋」，「苦行」o左咁耐，我都無用過個「氧氣罩」，所以習慣o左「少氧」o既情況．．．不過咁其實有一個壞處，就係成日都唔精神喇！

　　而尋晚，小僧諗住不如用番個「氧氣罩」o黎瞓，到今朝，果然係「晨早空氣　清新開朗．．．」

　　睡眠充足，以為今朝「苦行」會事半功倍．．．點知，問題就係咁樣發生喇！！！

　　我今朝大約七點半出門口，落到街，空氣清新，倍感精神。舉步而行，踏上征途；加上今日著o左對行山鞋，步履輕盈，諗住會好似尋日咁，好快就到達目的地．．．但係，點都估唔到，只係行到去廣華醫院、 YMCA 附近，我竟然開始呼吸急速，有少少好似唔係好「透」到氣！於是我放慢腳步，想話令自己o既狀況舒緩一下．．．但係去到彌敦道盤谷銀行，情況都好似無乜好轉．．．我知道就算我堅持落去都一定可以得，但就會喘氣得好犀利；顧及日後o既日子，我最後都係決定改為搭巴士喇！

　　上到巴士，我心裡面不斷諗點解，最後得出個結論就係「未習慣」！

　　此時此刻，腦海中突然浮現o左「失敗」兩個字．．．究竟，我今次係咪失敗呢？

　　但係，另一方面我又諗，我唔係話一開始就搵藉口去搭車而唔去「苦行」，咁又可唔可以話係「失敗」呢？

　　無論點都好，有一點我可以好肯定，就係「失望」喇！！！一開始我諗住今朝會有唔錯o既表現，但估唔到結果係「適得其反」！

　　結局既定，唔理佢「失敗」又好，「失望」又好，都已經係過o左去喇！與其「埋怨過去」，不如「努力現在，展望將來」！

　　既然知到係「習慣」o既問題，咁就「從頭o黎過」啦！

　　有o左過去個幾兩個星期o既經驗，我相信應該唔駛好耐，我就可以重拾「竅門」，繼續我「苦行之旅」！

《欠缺集中》Vs《高度集中》

　　經過o左一日o既休息之後，頭仍是痛，工亦仍是要返，所以，路也仍是要行．．．

　　可能尋晚比平日早瞓，今朝起身無平日咁掙扎，話起就起！好彩，亦無尋日o既情況，唯一係個頭仲有少少痛。

　　如平常般梳洗食o野飲o野，跟住就出門口喇！今日雖然著o左對無咁舒服o既鞋，但可能因為尋日無行到，兼夾唔知邊度o黎o既奮勇、熱誠，就決定要急步行，想睇下自己要去到邊度先覺得攰。

　　今日路程非常簡單：太平道＞窩打老道＞彌敦道＞梳士巴利道＞尖沙咀碼頭．．．之後o既就同平時一樣！

　　今朝就係咁，一路行、一路行，周圍咁望，諗住睇下有乜o野好寫；唔知係咪藥力生效定因為我頭痛，望o黎望去o的o野都唔係好入到腦．．．就好似有o的《欠缺集中》，睇到o既所有o野都好似「浮浮地」，好唔實在咁！

　　你話我暈咩！？老實講，我一o的暈o既感覺都無！！周圍o的o野縱使係「浮浮下」，但當我望住條路又鬼死咁清楚喎！清楚o既程度，就好似《高度集中》咁去做一件事！所以，我今日係行得比平日快！

　　不過，有一件事我可以好肯定：記得我第一日開始行，我行到去九龍政府合署對面，我就開始覺得攰喇！但係今日，我要去到佐敦道先至識得攰，仲有今日係急步行添！！！希望我可以繼續進步落去啦！！！

繼續頭痛．．．

　　今朝大概六點半，我個鬧鐘如常地響，但唔尋常o既係，我竟然完全聽唔到佢「鬧」我o既任何一聲，我估我應該係「習慣性」般，隻手自己去按o左個鬧鐘o既「暫停制」（因為佢會再響）。輾轉反側一番後，我終於「打敗睡魔」，去起身擦牙洗面！


　　就o係企起身o個一刻．．．只係一秒，我忽覺天旋地轉，於是我匆忙坐返o係張床道，先至發覺原來我個頭係痛到好似爆炸咁；之前所謂「打敗睡魔」，查實係剎那間o既「迴光返照」．．．唔怪知得我完全 ignore o左個鬧鐘啦！

　　經過o左大約一分鐘o既考慮，最後，我決定「偷懶一日」，叫做去搵醫生 check 真o的，唔係一陣「大吉利是」有o的乜o野事先至發現，到時就真係「苦行」啦！

頭痛第三日

　　「晨早起床　周身不妥　頭頸冤痛　苦況無限送．．．」

　　為o左唔好令大家有唔好o既感覺，只好將自己唔好o既o野用「歌聲」同大家分享．．．

　　雖然係咁，但我最後都決定今朝一定要繼續「苦行」，唯一唔同o既就係，今日我遲o左好多先出門口！

　　今日我揀o左內街行，即是廟街、上海街等等。就好似上次咁講，朝早o既廟街（今日專登行廟街），同夜晚o既好唔同；但我今朝再行o既時候，又有新發現．．．原來有一樣o野o係o個度係無論朝早同夜晚都一樣．．．就係「黃色事業」喇！而o係廟街最「盛行」o既，就係俗稱o既「企街」。（資料可於各大港產片參考；只要有講過或者影過廟街o既都有所記錄。）

　　小弟唔係想將「企街」當係今日o既 Topic ，更何況我對佢o既歷史認識有限，相信我所知唔會多得過你o地，反而有機會比你o地更少！

　　其實，排除o左歧視、偏見等等，「企街」都只不過係七十二行裡面其中一行而已。但對於呢一行，小弟確實有多重感觸．．．對於佢o地一早就「開工」，其勤奮之實，吾感欽佩；然而對於其墮落之感，吾感失望；但想到其人生（尤其到達老年之時），那無依無靠、空虛無限，吾感心疼！

頭痛．．．

　　唔知點解，尋日一起身鬼死咁頭痛，打個乞嚏，個頭仲好似要爆炸咁！經過多種藥油o既攻擊之後，叫做緩和o左少少，先至無咁辛苦！

　　到今朝起身，雖然無尋日起身咁辛苦，但個頭都仲係咁痛，就好似有個鎚仔輕輕力咁不停揼不停揼！

　　就係o係咁o既狀態下，我決定今朝由屋企去尖沙咀碼頭o個程，改為搭巴士喇！

　　雖然係搭巴士，但都記錄下o的時間先：



　　好彩今日唔係好猛太陽，天陰陰又落唔出雨咁，所以由中環碼頭返美利o個程都算係幾舒服，再加上我「龜速」咁行，無加重我頭痛o既負擔之餘有舒舒服服，都算得上係幾正！！！（當然，唔駛返就更加好啦！！！！）

不一樣的廟街．．．

　　廟街，俾人多種唔同o既感覺：熱鬧、平價、雜亂．．．然而，廟街o既早晨，又有幾多人細心咁欣賞過呢？

　　今日，雖然好鬼眼瞓，好想賴床，但一想到「苦行」，一股無名o既力量唔知由邊度湧入身體，就係咁就起o左身，仲要係鬼死咁早添！

　　一o黎攰，二o黎起身起得早，所以「把心一橫」，決定搵條新路行下，就去o左廟街喇！詳細路程如下：

何文田太平道＞窩打老道＞彌敦道＞文明里＞鴉打街＞東莞街＞廟街＞永星里＞上海街（曾想由北海街轉入廟街，但見空空如也，所以放棄）＞佐敦道＞廟街＞寶靈街＞吳松街＞九龍公園＞中港城＞海港城＞海運大廈＞尖沙咀碼頭＞中環

　　o係路程解說中都提過，朝早o既廟街，其實就係「空空如也」，同晚黑o既廟街相比，截然不同！反而今早o既九龍公園就多o左好多人喇！

　　其中我見到一個情景非常有趣！記得九龍公園內有個水池嗎？池內有多種雀鳥，其中一種叫小紅鸛（見圖），並且佔池內o既大多數！

　　我就見到其中有兩隻，佢o地個頭撞撞下，好似 kiss 咁，但係右邊o個隻撞得勁o的；另外，相信大家都知呢種雀鳥鍾意單腳企o既；就o係以上兩種情況下，左邊o個隻終於都被撞到企唔穩，迫住要兩隻腳落地先至唔駛跌落水！

　　唔知大家記唔記得响電視上面有個水上遊戲，係兩個人坐o左响條柱上面，再互相攻擊，再睇下邊個頂唔住跌落水就算輸．．．唔知，呢個遊戲o既來源係咪o黎自小紅鸛呢？

偷閒的一天

　　經過o左三日o既「苦行」兼夾「苦工」．．．辛苦的工作，不禁想偷閒一日！所以，今日就正正式式咁休息o左一日喇！當然，連「苦行」都休息了一天，明日繼續！

【外記：影評】
　　今日去o左睇 IMAX 版o既 Beowulf （魔戰王－貝奧武夫），講真，套戲o既劇情就麻麻，如果唔係o係 IMAX 睇o既話，我諗我瞓o左好耐啦！不過，最後o個十幾分鐘都幾緊張，應該瞓唔到！講返 IMAX ，套戲認真正！o個o的 3D 效果真係正到唔知點樣形容！尤其係影住 Beowulf 時，雖然係 CG+motion capture ，但係我就覺得做到成 95% 同真人一樣，只不過係差o的眼神做唔到（無計，唔同黐o的o野落眼珠度做 motion capture 咩！？）但係阿女魔王「羅拉」就有少少失望啦！成套戲淨係得出場o個幕有o的似真人之外，其他都覺得好卡通，本人覺得可以稱為「失敗之作」！至於「羔羊醫生」呢．．．不過不失，有好亦有唔好咁囉！一句講晒：極度推薦睇 3D IMAX 版，唔係一定睇到「眼坦坦」！

真正「苦」的一天．．．

　　「o都o都o都o都．．．」

　　朝早六點半，左邊耳仔個鬧鐘收音機無情咁響起，按停o左佢唔夠兩分鐘，右邊個手提電話就響起「大力水手」首音樂；迫於無奈底下，唯有拖著疲憊不堪o既身軀，去刷牙洗面喇！

　　都係怪自己唔好，之前一晚鬼咁夜先瞓；但係無計，要接女友放學，再去食飯，送完返屋企再自己返屋企都已經差唔多成點鐘，沖埋涼再整埋o的 routine o野都兩點喇，到正式瞓著都兩點幾．．．要六點半起身，得四個鐘瞓，唔攰就有鬼囉！

　　不過都總係要賴一陣床，最後搭十先起身．．．順理成章，今日都遲o左出門口（成七點半）！

　　今日因為比較攰，所以想行一條同平日唔同o既路徑；其實，我好早都預o左會咁行o架啦！就係經九龍公園過橋到中港城，再經海港城、海運大廈到天星碼頭。咁行有一個好處，就係無咁多人喇！

　　係呀，雖然今日遲o左三個字先出門口，但條街就鬼咁多人，尤其係學生哥，有男有女、有行路返學有趕巴士返學，總之一字記之以「多」。

　　去到九龍公園，雖然唔係咁多人，但著o左九成半都係老人家，耍太極又有、耍功夫又有、耍劍又有、就連耍花槍都有（真o架，真係有一對公公婆婆有講有笑鬼咁開心呀！）；當然，其中亦不乏返工o既人士．．．話晒都係尖沙咀，商業區喎！！！

　　返學（趕巴士趕行路o既學生哥）、返工（我自己）、到老人家耍ｘｘ（ｘｘ種類繁多，自行填上），其實，咁咪就係一生人o既寫照囉！記得有一個廣告，係講有一個女人要生仔，點知用力過度，將個 BB 「必」o左上半空；佢一路飛就一路大，由 BB 到小朋友、由年青到年老，最後佢就降落o係一個意味著死亡o既墳墓裡面，人生係咪就係咁簡單呢？我又唔係咁認同！唔好講得遠，就講返我今日見到o個o的老人家，佢o地鍾意耍乜都大把佢揀啦！更何況係一世人！？

　　「未來掌握於手」呢句說話可能係「土」o左少少，但係我就幾認同下喇，唔知你點睇呢？

香港人的通病

　　到了「苦行」第四日，滿以為會身心疲累，嚷著要退；不知何來推動之力，今日o既「苦行」竟可圓滿結束，再來就等待明日第五日「苦行」之來臨！

　　唔講唔知，昨日其實我「苦行」o左兩次：返工及放工各一。返工o個次就同大家分享過啦，而放工o個次都唔算得上好「苦」，話晒都去o左「鋸扒」做晚餐，先再慢慢行返屋企～～

　　今日「苦行」同尋日最大o既分別，莫過於對「鞋」啦！昨日著o左對行山鞋，所以行起o黎都有少少似飛咁；不過今日就唔係喇，行步路有粒石仔都「UN」到隻腳板死死下，所以要加倍小心！

　　講o左咁多，好似「叉」得越來越遠添！！其實，今日都唔算有乜特別，不過，當到達中環之際，就特別留意到香港人原來都有通病．．．話唔定你而家都有．．．就係．．．「皺眉」啦！！！哈哈！係咪o岩o岩都睇到皺皺地眉呢！？

　　就o係我落o左船之後至我到達美利大廈，我專登留意沿途各人o既表情，發覺十個著o左九個都係皺著眉o既！當時，我不期然的想，點解個個到係咁o既呢？同一時間，我亦驚覺原來自己也是皺著眉！

　　原來，香港人太多o野要擔憂啦！有時，我o地唔係話專登去擔心o的乜o野，而係不自覺咁去介意呢樣、介意o個樣！講真，人生在世，要介意o既話，又可以介意到幾時？六十歲？七十歲？定係到死為止？如果一世人都係咁過活，你話喇，o個個人會有幾開心？唔通真係要「咒怨」一世咩？俗語有云：死就一世，唔死都大半世囉！點解唔俾自己開心埋下半世呢？

　　在此，小弟奉勸各位一句：做人豁達一o的，睇o野自然睇多一o的，命仔都會長多o的o的！

（今日唔知點解個電話一早就鬼咁旺場，所以以上感想唔係寫得咁連貫，有「甩咳」之處，敬希原諒；如有雷同，實屬不幸！）

休息兩日後．．．

　　因為星期六、日唔駛返工，所以順理成章咁就休息o左兩日喇！

　　其實都唔算得係休息，如果天氣好、人腳齊的話，有時星期六都會去行山o架！不過，行山又係另一回事，有機會起另一個網誌再討論討論啦！

　　今日，其實都無乜特別事，係唯一去到 Parklane o既時候，有留意o的清潔工人掃街o既情況。我第一眼望埋去，就見到有一個清潔工人o係度掃緊地上面o既落葉，而佢掃o既方法就係將落葉掃落馬路邊o既坑渠．．．當時我心諗：咁我都識做啦！！！不過係一、兩秒o既想法，好快我就從另一個角度去諗：都唔係o既，可能係掃落葉o既第一個步驟o者；只不過係想集中o個o的落葉，然後好掃o的o者！！就o係我見到第二個清潔工人做緊一模一樣o既事之後，我就更加肯定我o既想法喇！

　　其實，好多時我o地都會俾好多o野矇騙o左，尤其係第一眼見到o既場面、對任何事o既第一個感覺。唔係叫你唔好信自己，只係每每遇到一o的唔如意o既事，好多時你會覺得：挑！早Ｘ知就咁咁咁啦！！！要知道凡事有兩面，就好似我有個朋友身處美國，佢當年o係世貿返工，剛剛出事o個一日佢竟然遲到，就係咁先執返身彩！

　　另外，我今日特登 mark 起o左o的時間，以作日後o既參考！

「苦行」第二日...

　　今日係「苦行」第二日，可能因為昨日的經驗，時間預得過份充裕，以至太早返到公司！！素來唔慣做一個好員工o既我，實在不知所措．．．所以，我今日決定遲多幾個字至出門口，同時，我可以同周公捉多幾個字棋！

　　大概 07:20 ，我收拾行裝、整裝代發，終於下定最最最最最最大o既決心（因為今日要拎住自己個大背囊同埋公司部 laptop，所以曾幾何時考慮過不如今日搭地鐵啦～～～），最後打開屋企大門，邁向我第二日o既「苦行」之路！

　　同昨日好唔同，只係遲o左三個字度o既時間，條街比起昨日多o左好多車同人，而且，有o的舖頭仲開埋賣緊o野添！熱鬧o既街道，同昨日比較起上o黎，就好似身處兩極、南轅北轍，但係，講緊只係約 15 分鐘o既差別。

　　可能因為聽住 MP3 o既關係，今日步伐感覺上比昨日輕快，就算身負「重磅」（講緊係行李，唔係自己 *_*"），亦能無視其之存在。而且，昨日「不愉快」o既感覺，今日就算行畢全程亦絲毫未覺！！最最令我興奮o既，係我竟能將時間預料得無比準確，同我平日搭地鐵o既到達時間一模一樣！！

　　其間，李克勤的 My Cup of Tea 同埋楊丞琳的 任意門 在我耳邊交替著，一路「伴我征途」。而聽到克勤及小剛合唱的一首「歲月風雲」，其中的歌詞突然令我感概萬分，不自覺的有少少衝動想哭出來：
　　『我們受傷　我們越強 風浪打造夢想 希望我的人生沒有遺憾』

　　回想自己的過去，究竟遇過多少「風浪」？「受傷」過幾多次？風浪、受傷過後，又有否變「強」？又要強到什麼程度，「人生」才可以「沒有遺憾」？．．．．．．

　　想著想著，不自覺的到達了目的地，又要開始繁忙的一天～～～～～～

行路去...

　　今日係 2007 年 11 月 9 日星期五，係天朗氣清的一日！！！

　　而昨日，係爸爸媽媽出發去日本上海的第二日，同一時間，亦係我下定決心的第一日！！！決心做乜？？就係要鍛鍊身體，最好就係減埋肥添！！！不過點都好，要點係令自己身體好，唔好咁多病痛，咁就自己活得開心、家人活得安心喇！！

　　第一日，天氣麻麻，個天仲落o左幾滴雨添～～見當日工作要出 site ，要攞住部 laptop 放工返屋企，所以決定瀟瀟洒洒，只係帶把遮仔就出門口（不過之後全日都無開過，早知就唔鬼帶啦！）路途中，唔知係咪唔夠瞓定係因為第一日頂唔住，有屋企開始行，去到佐敦咁上緊就有少少頭暈眼花～～～不過咁啱有位 gentleman 經過，佢瀟洒輕輕從口中一吹，個陣令人討厭o既輕煙迎面吹過o黎，我唔覺意咁一吸～～～咳～咳～咳～～～～～嘩！嗰陣煙味，竟然令我精神為之一震！！！唔係鼓勵吸煙，不過～～～～我都唔知點講～～～總之，今次都算係幾特別的體驗，但小弟都係要 remind 一句：吸煙危害健康！！！

　　之後，去到尖沙咀，見到一位婆婆帶住隻狗散步，但隻金毛尋回犬行行下竟然「扭計」，一個屁股坐o左係度唔肯郁，當時情境都幾得意！仲有最估唔到o既就係：原來咁早o既彌敦道係無乜人車，只係「間唔士」得幾架巴士行過嘈下咁囉！！