無奈

　　而家已經係夜晚嘅九點五十三分，離我今朝「應該」苦行嘅時間已經過咗成十幾個鐘喇！咁點解會咁夜先至嚟呢度寫嘢呢？當然係因為今日嘅工作超多啦！話實，真係差啲做死咁滯！

　　講返今朝，又點解會話「『應該』苦行」呢？咁當然係我今日無行度啦！

　　其實，主要係因為我晏晝會無飯食（熟識我嘅朋友就知我平日食晏晝飯係响公司啲阿姐度搭食嘅！真係慳好多o架！！！而今次無飯食係因為所有阿姐今日有聚餐），所以我係「有預謀地」早一晚就約同事喇！去邊？咪去蓮香飲茶囉！

　　講到飲茶，我今次係第三次喇！而對上兩次食嘅雖然唔多，但係就可以頂到一日！

　　亦好彩我今朝有咁嘅舉動，唔係好似今日咁繁忙，做到死咁，就真係好唔抵啦！！！！話晒，朝早都叫做「他調」過吖！

　　最後，我就好正式咁同大家講一句：苦行日記，是日休息！！！！