大塞車

　　哥哥尋晚去完旅行返嚟（嚴格嚟講應該係今朝，因為佢差唔多成兩點先至返到），我哋成家人知佢無鎖匙，所以等埋佢至去瞓覺。就係因為咁，我就成三點至瞓，而家勁眼瞓！

　　不過，我亦特登今朝瞓多少少，晏啲先起身。七點起身擦牙洗面，食埋早餐，差唔多八點至出門口。

　　落到街，有啲雨粉，不過都唔理得佢咁多，遮都唔開咁繼續行去搭巴士。可能今朝真係比平時晏，所以架巴士一轉落公主道無耐就開始塞車；但係正如我之前提過，我因為眼瞓，所以一上車無耐我都開始閉目養神喇；不過，我今次就同平時有少少唔同，因為每次我醒咗之後就差唔多到站，但係今日到我醒咗，估唔到我仲係喺九龍未過海！！

　　咁我當然係乜都唔理繼續瞓啦！如是者「輪迴」咗幾次，終於都到咗胡忠大廈喇！呢個時候，我亦已經無咁眼瞓，所以今次都係無過站嘅！

　　到我正式返到公司埋到位，原來已經九點鐘喇！不過，正如老闆話齋：一次半次無問題，成日就唔好喇！