寒流攻心

　　今朝氣溫攝氏九度，最高為十二度，濕度．．．應該係乾燥。

　　5:55 ，鬧鐘開始執行佢本身嘅責任。平日，大概響一至兩分鐘，我就會醒，然後按咗鬧鐘嘅暫停制，再瞓多約十多分鐘，鬧鐘會再度響起，跟住就會正式起身，擦牙洗面出門口；不過，今朝寒流攻心，就算坐咗起身，令我不禁要再度「捐」番入個被竇，好似驚住會凍僵咁，縮埋一舊。

　　掙扎咗一段時間，終於約 6:30 ，成功起床之後，快手快腳咁去擦牙洗面，然後再「捐」番入被竇度取暖．．．良久先至走番出嚟換衫出門口。

　　落到街，唔知點解，個身勁震；雖然今日著多咗衫，但係就好似一啲都唔暖咁！喺呢個時候，我暗地裡作咗一個決定：唔行啦！真係好鬼凍！今日都係搭車算啦！

　　不過，今日唔行歸唔行，都係唔想搭 103 咁「唔駛行」，所以，最後決定搭 7 號到尖沙咀碼頭轉船，再行一小段返工。一如以往，雖然今日都係遲咗少少，約 8:20 返到，但係都係一個人都無，由我開門。