【苦行日記】重新營業

　　經過咗一段長時間嘅煩惱，終於絕大部分嘅陰霾已經散去，只剩返一小部分尚未解決嘅問題，亦應該可以喺可見嘅將來解決，都算係可喜可賀。

　　另外，又因為長期落雨嘅關係，小僧被迫暫停苦行。

　　終於，今朝好順利咁 6:00 就起咗身，擦埋牙洗埋面飲埋杯「擂茶」，唔駛 6:40 ，我就可以出發喇！

　　落到街，好彩無落雨；見咁嘅情況，二話不說，一於由今日開始，【苦行日記】正式重新營業！

　　一路行，其實個天都係陰陰哋，不過喺好大舊嘅黑雲層當中，可以勉強窺視到少少嘅藍天白雲：


　　途中都無乜特別，仍然係一條無乜車嘅馬路；不過，我今日先至發覺，原來條馬路都唔係真係無乜車，只係一時有、一時無，而且有起上嚟都唔係話好少，但係就全部都係巴士囉！

　　去到尖沙咀碼頭，停泊係海運大廈嘅旁邊，係一隻有少少似軍事用嘅船（又可以作為我嘅「收藏品」之一啦！^_^）：