苦行日記

煩請各位幫手投票（一人可投多次）

2008-11-19T00:55:00.000+08:00

　　各位同小僧有緣嘅網友，好日無寫呢個部落格，而家一寫番，就要向各位求救，真係唔好意思嘞！！！

　　其實小僧參加咗 Wedding ESDLife 嘅一個相片嘅投票比賽，本來形勢不俗，最高攞過第２位嘅票數；但係而家「選情告急」，其他人應該用咗一啲非常手段，將我逼到落去第７位，而且票數仲拋離添！

　　喺呢度，小僧唯有「厚著面皮」，向各位求救，方法如下：

（一）用你嘅 Web Browser ，去呢個網址：

http://campaign.esdlife.com/wedding/watabe_2008/vote.php?picid=14992

（二）不厭其煩咁投小僧一票

（三）得閒嘅話，可以重覆上述動作（一）及（二）無數次

　　小僧喺呢度先謝過大家嘅幫忙，等個投票完咗，小僧再同大家分享一下箇中逸事！

特別公佈：「苦行日記」將會不定時發佈

2008-09-04T10:48:00.002+08:00

鑑於最近公、私兩面日漸繁忙，對上一次所發佈嘅「苦行日記」亦已經係兩個月前嘅文章。經過一番嘅研究、探討，現決定「苦行日記」將會不定時發佈，特此通告。

返工新路線【紅磡碼頭篇】

2008-07-21T09:33:00.004+08:00

晨早六點未夠，個 iPhone 就盡責地叫醒咗我。睡眼惺忪咁起身擦牙洗面，慢吞吞咁搞到差唔多 7:00 至出門口。

　　落到街，好似無乜方向咁樣，想話去苦行，但係又唔想行同一條路；把心一橫，諗住去搭火車到紅磡再行海旁去尖沙咀碼頭．．．

　　正喺準備起行嘅時候，突然腦中閃過一個奇想．．．都唔係話奇嘅，只不過以前有諗過嘅一條路線：去紅磡碼頭搭船！

確定行程後，先去巴士站等 7B 或者 8 號巴士；好彩等咗一陣，係 7B 先到，咁就可以唔駛行咁遠，直接到紅磡碼頭；如果 8 號嘅話，就要多 10-15 分鐘由紅磡行過去碼頭喇！

到咗之後，見到有隻船喺度，一心諗住行快啲去趕呢班船．．．望真啲，原來係啱啱上完客，離開緊。因為知道呢度啲船嘅班次比較疏（約 15-20 分鐘），所以索性去咗碼頭嘅一間茶室食個早餐（平！只係 $19 咋！）；較啱時間走返出嚟，見另一隻船正正埋緊岸，啱哂！

落船之際，見個天氣好正，不禁要幫個天同埋 IFC 影返張沙龍先！

呢隻就係我啱啱搭完嗰隻天星小輪喇！

行緊返公司之際，咁啱見到填海嗰班工人喺度做緊早操！

　　另外，仲有一樣嘢值得一記嘅！話說上星期五， office 向 HP 攞咗一部 HP Mininote 2133 嘅 Demo 機；基於呢部機係我 suggest 話試嘅關係，而我同事「Cero」又知道我好鬼死鍾意呢部機，所以我啱啱個週末就帶咗返屋企試喇！部機嘅好與壞我而家就唔講咁多住（始終都未試完嘛），不過我就喺搭緊巴士同搭船嘅時間，攞咗出嚟用，主要係寫緊我嘅【外傳】。講真，用起上嚟，我都真係覺得幾放便o架！此外，我嘅【外傳】都唞咗成幾個禮拜囉！都係時候重見天日啦！大家得閒就過去「坐吓」啦！

紀念紙幣的吸引力

2008-07-17T08:22:00.004+08:00

尋晚好夜瞓，今朝有啲懶，所以無去苦行。

　　不過今朝行過中銀總行，見到啲鐵欄，不禁驚嘆中國人嘅耐性！無論係內地、本地人，為咗嗰張奧運廿蚊紙，竟然可以幾日幾夜唔瞓；再者，佢哋可以 keep 住排隊，不分晝夜。諗返我自己．．．講真，我就一定唔會咁好耐性喇！

　　不過都係一齊睇吓事後空蕩蕩嘅鐵欄，同埋仍是熱血嘅同胞啦：

千呼萬喚始出來

2008-07-16T08:27:00.010+08:00

久遺咗嘅苦行，喺休息咗就嚟成個月之際，終於喺今日再度「營業」。其間嘅喜、怒、哀、樂，遲啲會喺【外傳】詳談，請密切留意。

　　廣告賣完，就回歸【正傳】，講返我今日嘅苦行。不過話時話，要講我其實都唔係好知講乜，不於唔好嘥大家嘅時間，一齊睇相吧啦！

　　首先，睇一睇我今日嘅主要路線：

落到街，經過窩打老道，再到達彌敦道；由油麻地行到佐敦就轉入佐敦道。喺白加士街交界過完馬路，就直行到柯士甸道再過馬路。跟住，由柯士甸道，左轉入九龍公園。

入到去九龍公園，發覺今日好多人，原來有好多泳客！炎炎夏日，游泳可謂一樂也！只可惜我「牛高馬大」都仲未熟水性，無奈失去一大樂趣！

由九龍公園，經過一道橋後，就可以到達中港城。

唔知今日係唔係「驛馬之日」呢？好多人等緊去搭船。又唔知佢哋係返大陸定係過澳門呢？

中港城為咗迎接奧運，特地搞咗個 function　，仲整咗好多熊貓公仔添！講真，我覺得呢啲熊貓公仔仲靚過嗰 5 隻福娃添！

離開咗中港城，過條馬路仔，就到咗港威大廈。天氣咁好，氣溫咁高，就當然係入去涼吓冷氣啦！由呢度可以去到海港城同埋海運大廈，不過啲舖頭當然係未開啦！

唔好話舖頭，原來就連海運大廈都係「關門大吉」！（當時係 7:30 ）

行過咗海運大廈，咁啱見到雙子星號泊緊岸．．．影低佢先！

平時見親啲大遊輪都有隻船仔跟住，原來係泊岸嘅時候用嘅！

睇完船，轉身見到有啲擺設喺度．．．原來海運大廈都一齊迎接奧運！

二話不說，去搭船先！

兩款天星小輪嘅櫈：左面嘅喺碼頭，右面嘅喺船上面。

上咗岸之後，要上一條長天橋。當時都只不過係 7:45 。

喺條長天橋嘅左邊，就係而家填海填到面目全非嘅舊中環碼頭對開海面。

行完條長天橋，要再接一條比較舊又連接好多大廈嘅天橋。

最後，返到美利大廈！平時呢個 shot 喺報紙就見得多，而且都係放工時間；而家自己影，仲係返工時間，我諗都係第一次喇！

電梯入面嘅制，仲 keep 住用膠紙保護住，你話係咪好衛生呢！

最後，終於到達工作嘅地方．．．辛勞嘅一日又要開始！

假期前的最後一天

2008-06-26T11:03:00.002+08:00

今日係我放假前嘅最後一日返工，而聽日嘅呢個時候，我已經身處外地啦！

　　不過尋晚開始執行李，已經執到成四點幾至瞓，所以今朝就索性瞓多一個鐘，七點至起身。

　　好彩瞓多咗一個鐘，皆因一起身見到嘅又係一片白濛濛嘅街景．．．

　　所以今朝都係順理成章咁搭巴士返工喇！

　　順帶一提，由聽日開始，因「東主有事」，【苦行日記】將休息一段短時間，至 7 月 7 日或打後為止。

「風神」來襲

2008-06-25T12:27:00.003+08:00

　　今朝颱風風神襲港，天文台懸掛 8 號西南烈風或暴風信號，因而有半日假放，所以「苦行日記」休息一天，特此通告。

熱到溶～～

2008-06-24T08:43:00.002+08:00

今朝天氣極度悶熱，氣溫最高可達攝氏 32 度，而且 1 號颱風信號依舊懸掛。

　　正因為咁嘅天氣，今日本來已經苦行咗一半路程，但始終都係休息得唔係好夠，所以最後都係走咗去搭巴士，不過唔係過海，只係去尖沙咀碼頭啫！

　　落船之後，沿著條橋行緊返嚟之際，見啲人全部都走向橋嘅右邊，而左邊就一個人都無！無他嘅，咪因為太曬嘅關係囉！

　　但係講真，我就寧願俾太陽晒好過俾雨淋喇！你呢？

勁頭痛．．．

2008-06-23T09:16:00.002+08:00

尋晚好早就瞓，諗住今朝繼續苦行．．．

　　今朝個鬧鐘好有責任咁喺 5:55 就響，好辛苦咁按停咗佢之後，本來想話起身，但係個頭就「發吓發吓」咁，勁痛．．．

　　突然，我落咗一個好沉重嘅決定，就係要瞓多一個鐘，睇吓有無好轉。

　　如是者，嗰一個鐘原來真係好有幫助。 7:00 起身，個頭唔單止無痛，而且仲好似精神奕奕添．．．

　　不過，呢啲只係一時間嘅「錯覺」！

　　頭痛無錯係好咗好多．．．咁就證明呢個係休息唔夠嘅主因喇！鬼咩，連續兩個星期六都要返工，仲要鬼咁早，返到去之後又勁多嘢做．．．

　　至於「精神奕奕」．．．呢個就真係一個絕對嘅錯覺！而家返到公司已經成幾個鐘，我都仲係「烏吓烏吓」咁．．．

苦行日記．圖文解說篇

2008-06-20T09:06:00.006+08:00

今日一反傳統，嚟一次「廢話少說，看圖為實」！

先由 21 樓嘅屋企搭 lift 落街。

落到街望到啲藍天白雲，心情特別輕快！

行經彌敦道嘅呢間酒店，突然好多嘢諗；真係無呢度無我呀！點解？呢度就係我阿爸阿媽擺酒嘅地方啦！

行到去佐敦嘅呢個轉角位，有間「美食店」，係一間算係幾大幾多元化嘅小食店之一，啲嘢仲幾好食添！

行前少少有間「麵麵店」，呢度嘅車仔麵亦係另一美食之選。

因為暫停咗苦行而好耐無嚟過嘅九龍公園。

喺泳池對出嚟有個奧運倒數，而隔離就種咗好多好靚嘅花，圖中只係其中一種！

九龍公園朝早亦不乏晨運客。

由呢條傳說中嘅「震震橋」就可以過去中港城啦！行到中間嘅時候，真係好震o架！唔知呢條橋係乜嘢結構嘅呢？

途經中港城嘅接船大堂（三樓）同埋離境大堂（二樓）。

原來中港城個 Information Counter 有輪椅可以借o架！

終於到達尖沙咀碼頭啦！嘩！天氣咁靚，同佢影番張靚相先！

右邊就係搭去中環嘅入口。

圖為天星小輪嘅代幣機（左）、俾太陽曬住嘅船上坐位（中）、啱啱泊岸嘅天星小輪（右）。

落船後，沿路都見到久未露面嘅陽光，就算當時行到汗流浹背，心情依然舒暢！

過買呢個隧道，又要開始一日辛勤嘅工作啦！

太陽出來了！！．．．．？？

2008-06-19T08:38:00.005+08:00

今朝瞓晏咗半個鐘，不過都無阻我今日苦行嘅計劃。

　　未落街，已經見天氣唔錯，起碼有藍天白雲；落到街，直頭就係有驚喜！

　　一路行一路個心喺度諗：唔通我個同事真係咁黑？之前一路落雨落唔停，今日佢一放大假話去旅行，就即刻陽光普照？

　　不過，原來我嘅擔心係無根據兼完全錯哂！

　　當我返到公司，再望返出窗口，就見到咁嘅情況喇：

　　唉！究竟太陽伯伯要放假放到幾時呢？

【苦行日記】重新營業

2008-06-18T08:12:00.003+08:00

經過咗一段長時間嘅煩惱，終於絕大部分嘅陰霾已經散去，只剩返一小部分尚未解決嘅問題，亦應該可以喺可見嘅將來解決，都算係可喜可賀。

　　另外，又因為長期落雨嘅關係，小僧被迫暫停苦行。

　　終於，今朝好順利咁 6:00 就起咗身，擦埋牙洗埋面飲埋杯「擂茶」，唔駛 6:40 ，我就可以出發喇！

　　落到街，好彩無落雨；見咁嘅情況，二話不說，一於由今日開始，【苦行日記】正式重新營業！

　　一路行，其實個天都係陰陰哋，不過喺好大舊嘅黑雲層當中，可以勉強窺視到少少嘅藍天白雲：

　　途中都無乜特別，仍然係一條無乜車嘅馬路；不過，我今日先至發覺，原來條馬路都唔係真係無乜車，只係一時有、一時無，而且有起上嚟都唔係話好少，但係就全部都係巴士囉！

　　去到尖沙咀碼頭，停泊係海運大廈嘅旁邊，係一隻有少少似軍事用嘅船（又可以作為我嘅「收藏品」之一啦！^_^）：

心情唔好．苦行暫停

2008-06-02T08:51:00.003+08:00

致各位友好，

　　最近因為工作轉型上遇到賤人，本來傾好哂嘅 Contract ，全因間死人 agent 反口，導致兩敗俱傷。

　　亦因為咁，現正值養傷期間，所以要暫停苦行日記（但唔代表唔會苦行．．．睇吓有無落雨再決定）。預計遲多兩星期再同大家見面啦！

「情到濃時」四連拍

2008-05-27T09:53:00.003+08:00

今日一樣如常咁早起身，然後出門口。

　　初時見個天色麻麻，不過都仲有一線曙光，所以最後都決定苦行。

　　由屋企出發，行到佐敦嘅時候，有少少雨粉，而且個天啲黑雲聚埋一齊喺正頭頂，所以就改變行程，走去搭港鐵。

　　跟住去咗金鐘嘅 Canteen 食早餐，食完都仲未夠八點。最後，就諗住經香港公園返公司喇！

　　本來全程都預咗無相影o架啦，不過，最後見到一啲情境，都係忍唔住影低咗：

「情到濃時」四連拍

維港早晨

2008-05-26T08:52:00.004+08:00

尋晚陪爸爸飲酒，借啲意飲多兩杯，想早啲瞓，所以尋日全日無同女朋友聯絡過！

　　因為太早瞓嘅關係（九點幾就上床瞓喇），所以今朝超早起身（六點唔夠）！亦因為早起身嘅關係，所以今朝一早出門口去「苦行」。

　　不過，今日嘅「行程」有少少特別。

　　其實好早以前已經試過，就係搭火車到紅磡站，再行尖東海旁到碼頭轉船喇！

　　今日嘅天氣唔算好好，有啲烏雲，不過總算無落雨，都算係咁啦！

記得上次行呢度又係有人游水，今次都唔例外！

星光大度舉行咗一個展覽，係同原創漫畫有關嘅。

展覽中有啲漫畫角色嘅人像，都係一啲較為人知嘅角色，而最特別嘅係右手邊嗰個王小虎，係好多年前出自黃玉郎先生筆下嘅，對比番而家嘅王小虎（中間幅圖嘅中間嗰個），真係好唔同！

途中見好多人喺度釣魚

台灣之旅後嘅第一次苦行

2008-05-23T08:36:00.004+08:00

喺台灣返嚟之後，因為一路都唔係好夠瞓，所以一直都無去「苦行」。除此之外，亦一直埋頭於台灣之旅嘅記趣（詳情可以睇吓我個「外傳」），所以無喺呢度寫嘢成個禮拜咁滯！不過，呢個「苦行日記」由今日開始再度「營業」！

　　無行咁耐，初初以為會有啲唔適應，點知一行就腳步輕盈，有如輕煙一樣。係咁行係咁行，唔覺唔覺就到咗佐敦喇！

　　途中，我發現喺我面前有一對小情侶：

　　望真啲，見佢哋原來「十指緊扣」添！

　　首先，我唔係特別反對學生拍拖，所以我唔評論呢對小情侶嘅「應該」與「不應該」。反而，我一路望住佢哋，就喺度諗：如果我又係咁早拍拖會點呢？

　　當然，我係唔會得到任何答案啦！所以我突然發力，行過咗佢哋之後，就繼續向尖沙咀碼頭進發。

好耐無見嘅奧運倒數計時，原來仲剩返 77 日咋！

旅程後嘅病徵

2008-05-15T14:32:00.002+08:00

經過咗八日嘅台灣之旅，喜、怒、哀、樂樣樣有，詳情請轉移玉步，到我嘅外傳欣賞欣賞！

　　不過，返到嚟之後，發覺不期然咁病咗～～～呢種病其實個個都會有，就係嚴重缺乏充足睡眠症。

　　呢種病，喺自由行嘅人士嚟講，更為肆虐！

　　我諗我短期內都未可以完全好番；而且，呢幾日正正為我嘅外傳整理整理，痊癒之日更難估計！

　　所以，我係度奉勸各位，係短期內到外傳參觀；假以時日，正傳定必重臨！

台灣之旅．準備出發

2008-05-06T04:47:00.002+08:00

嚟緊由今日，即係 5 月 6 日開始，至到 5 月 13 日，係小僧嘅台灣之旅，所以呢咁多日都唔會有「苦行日記」o架喇！

　　不過，喺呢咁多日裡面，我會繼續喺我嘅【外傳】記低我嘅所見所聞，希望可以同大家分享一下！得閒就過去 http://hk.myblog.yahoo.com/walkalone-twt 嗰邊望吓啦！

出發前嘅早茶

2008-05-05T14:22:00.002+08:00

今朝特登較早啲時間起身，諗住方便多方面發展：苦行、飲茶等等；最後，見個地下濕哂，都係決定咗去飲茶！

　　所以，今朝未到六點半就出門口，大約七點多就去到蓮香。坐定定，開咗位，沖杯靚茶，跟住就嘆咗大約九個字左右，食咗三籠點心，然後再慢慢踱步返工。到達公司時大約八點。

　　跟住就開始工作，「拿拿臨」清埋手頭上嘅 job ，全朝完全無停手；另外，亦向老細攞咗幾個鐘嘅 time-off ，所以，而家寫埋個 blog 之後，時間亦都差不多．．．做乜？咪要早啲返屋企休息，今晚凌晨要起身，聽朝六點半要到機場，聽日就要出發去台灣啦！！！！！

雨天迎聖火．火炬傳香江

2008-05-02T08:51:00.002+08:00

今日係 2008 年 5 月 2 號，亦係北京奧運聖火傳遍世界後再次進入中國，以香港為第一站嘅一日。仲記得早幾日香港好多地方已經開始進入準備狀態，好似尖沙咀有封路措施、中環架設鐵馬等等，令我感覺到香港人個個士氣高昂、齊心合力。

　　本來今朝，我都好「士氣高昂」，未夠 6:00 就起咗身；不過聽到出面有水滴聲，已經心感不妙；落床望出街，睇到個地下濕哂，再聽到爸爸講咗一句：「落緊雨呀，唔駛望啦！」

　　見到咁嘅情況，我都去咗廁所「開細」，跟住就返房，臨閂門之際講咗一句：「落雨？咁我瞓多粒鐘先～～」之後，就再戰周公三百回合。

　　矇矇矓矓之際，心裡面突然浮咗個問題：「傳火炬至嚟落雨咁搞笑？咁咪．．．」都未嚟得切諗埋第二句，我就再次進入夢鄉啦！

出發前準備

2008-04-30T09:45:00.002+08:00

前日公司發生咗盜竊案，有同事涉及其中，而我亦要幫手準備證物～～高清短片 DVD 一隻！所以，尋日成朝喺度玩 video editing ，無記低我嘅「苦行日記」。

　　尋晚又喺屋企趕工，為咗要整好本「台灣旅遊書」，所以成三點至瞓。亦因為咁，今朝都係超級眼瞓！

　　不過，我心裡面突然想話照去苦行，唔理佢遲到唔遲到！

　　最後，都係未到九點就返到喇！講真，比起我預期快咗少少添！

一星期倒數...

2008-04-28T08:31:00.002+08:00

距離去台灣影相嘅日子，只係剩返一個禮拜，心情話興奮又未係十分興奮，反而有少少憂心忡忡，唔知覺得點咁．．．可能話哂第一次啦～～～又或者係要同埋「四大長老」一齊去，有啲壓力啦～～～

　　尋晚，阿媽問我駛唔駛食早餐～～～心諗：有愛心早餐梗係好啦，不過再諗深一層，剩返一個禮拜，如果早到起身又唔落雨嘅話，我都係想去苦行一番，所以就叫媽媽今朝唔駛準備我嗰份早餐喇！

　　不過，我又未至於話要空肚全朝咁犀利！仲記得睇過有篇報導話，靠唔食嘢嚟減肥嘅效果，遠遠唔及有食嘢嘅，而且有好多都得到反效果添；事關如果你係食開早餐嘅話，你嘅身體機能適應咗，只要唔係過量都算係一個均衡嘅飲食習慣；但係如果唔食早餐，成朝要挨肚餓，身體機能未能習慣，到中午一旦有嘢落肚，因為肚餓得耐嘅關係，吸收自然比平時多，反效果亦因此而嚟！

　　就係咁，我今朝又可以六點二左右起身，都算早；而媽媽又只係準備咗一杯熱水俾我，飲咗就出門口喇（當時只係六點七）！沿途都無乜話好趕，亦有食早餐，食完又繼續行．．．最後，未到八點半就返到公司啦！

失手

2008-04-25T10:45:00.003+08:00

今朝適逢其會，因應某啲情況發生咗，所以尋日約咗個同事今朝去飲茶。亦因為咁，我今日係無去行嘅！

　　本來我哋約咗 6:30 喺旺角港鐵站等，我亦怕我唔知醒，所以一早較定兩個時間，仲係用一啲好鬼煩人嘅音樂，務求令自己一定醒！

　　點知，世事往往係好出人意表嘅！一於預料，我自己唔知醒．．．但係最搞鬼係，我同事已經兩次打過俾我，不過佢話無人聽～～～我覺得好奇怪，點知 check 返之後，先至發現原來我同事打錯電話俾佢另一個 friend ！！！

　　不過點都好，我都係好唔好意思，唯有將功補過，請我同事飲茶啦！

飲茶

2008-04-24T09:48:00.003+08:00

尋日去咗未來老婆屋企食飯，同阿未來舅仔慶祝生日咁話喎！食完飯返屋企，飲埋阿媽幫我燉嘅川貝，再 check 吓 e-mail 等等，大約一點幾就去咗瞓覺喇！

　　瞓覺之前，我見我自己好耐無用過部呼吸機瞓覺（因為咳咗好耐，而每次一用就引發到咳得勁犀利），又見自己啲病好似好咗唔少，所以尋晚就試吓用喇！好彩，用落無乜反效果，於是就咁瞓著咗喇！

　　點知，尋晚三點幾終於都係咳醒，皆因部呼吸機令到個喉嚨好乾涸，引致咳嗽。走去廁所清咗啲痰之後，再飲杯水，然後返上床繼續瞓，不過就無再用呼吸機喇！

　　不過，雖然唔係全晚用呼吸機，但係今朝都好早就起咗身（ 6:00am ），而且精神尚算不錯！

　　落到街，發覺落緊毛毛雨～～～本來想話由屋企行去尖沙咀碼頭，但係而家就落空咗喇！

　　突然諗起爸爸，二話不說，就打電話俾佢，問明身處何方，跟住就走去搵佢，陪佢飲茶喇！

　　大約七點半，我先行一步，去咗搭 104 號巴士，返工去也～～～

拍戲

2008-04-23T09:13:00.003+08:00

今朝又係好順手咁按熄咗個鬧鐘，亦造就咗我瞓多一陣。大約七點八，我就孭袋出門口喇！

　　一出到街，我發覺原來今朝落雨，心諗：今日都算好彩喎，今朝落雨，咁啱我又唔知醒起身，咁就順理成章咁去搭巴士啦！

　　諗到呢度，忽然聽到前方人聲鼎沸．．．望真啲，原來前面拍緊戲！

　　停咗係度望多兩眼，睇吓係邊個先～～～原來係佢：

　　其實我都影咗佢一兩張相，不過後期睇返先發現，原來我都好遠距離，影到個人超細，有好多仲俾人借咗添！

　　望咗一陣，見時間唔早，都係走人啦！臨走前仲影咗幾張「幕後相」。

今日天晴，海面．．．

2008-04-22T08:26:00.012+08:00

經過咗一晚嘅休息之後，今朝小腿好似無咁痛，好咗好多咁，於是就膽粗粗又去苦行喇！不過，自己知自己事，今日係唔會行足全程，亦一定唔會「全力以赴」，只會休休閒閒咁去行。

　　亦因為咁，尋晚較定鬧鐘，今朝一早起身；好彩自己亦不負所望，起身後快手快腳，唔駛六點九就出咗門口喇！

　　路程方面，就好似我上星期初練習嘅一樣，亦即係由屋企開始，行到下面呢個巴士站為止：

　　去到尖沙咀碼頭，見到海運大廈有隻船，咪過去睇吓囉！嗰隻係一隻未見過嘅船，不過體積同以前嗰啲比較就．．．

　　同隻新船影完「沙龍」，就去攞咗份報紙，跟住就去搭天星小輪。入咗閘之後，例牌都會望一望個維港．．．咦！點解咁嘅？唔通．．．呢啲就係叫做「海面有煙霞」？

左面嗰幅係用我部 Pentax 嚟影嘅；而右面就係用 iPhone 。

　　我估．．．呢啲其實係「海市蜃樓」啩！！！點都好啦，因為未見過，所以都係影低留念！

以防睇唔清楚，呢幅係 zoom 咗兼無縮細過嘅原相。

競步賽翌日～～跛腳

2008-04-21T08:45:00.004+08:00

啱啱寫完個外傳，係有關我尋日所參加嘅港鐵競步賽；有興趣嘅朋友可以去我個外傳度睇一睇。

　　尋日若中午返到屋企，上咗一陣網，飲杯奶茶，下晝四點鐘度就去咗瞓覺（話哂都係天未光就起身）；跟住夜晚阿媽叫醒我食飯，之後睇咗一陣電視就瞓覺喇！

　　本來想話今朝六點起身，點知個鬧鐘嘈就嘈醒咗我，但係我就好快咁整停佢之後再瞓過～～終於，七點幾阿媽叫醒咗我！

　　起身落床啦～～一落床到地嗰一下～～嘩！小腿勁痛呀！可能尋日真係激得滯啦！而家行路都仲係「跛吓跛吓」咁，不過，我諗過多兩日就無事o架啦！

　　但係最可惜嘅係，可能聽日都要好似今日咁，無得行，要去搭巴士返工．．．又即管睇吓聽日會發展成點！

終極測試

2008-04-18T08:42:00.007+08:00

尋日好趕咁就寫完我嘅第 100 篇網誌，真係唔經唔覺咁就寫緊我第 101 篇，真係要慨嘆一句：時光飛逝！

　　講開時間，我見今日星期五，係一星期裡面要返工嘅最後一日；對於嚟緊星期日要競步嘅我，亦代表咗今朝係我可以「借啲意」去練習嘅最後一日。所以，尋晚臨瞓前我已經有咗最後決定：今朝除咗搭船之外，要行足全程！

　　雖然尋日好晏至返屋企，相對地亦都夜咗瞓，但係可以今次意志堅定，所以六點搭三、四就起咗身喇！食咗少少嘢，七點就出門口。

　　一落到街，第一件事就係開始計時。今次計時個行程會係咁（期間共分四個時段）：

屋企樓下<00:09:58.9>油麻地彌敦道(盤谷銀行外)<00:07:08.4>佐敦道(彌敦道交界)<00:08:04.2>尖沙咀清真寺<00:08:34.3>尖沙咀碼頭

　　經過計算，原來我今次只係用咗 00:33:45.8 嘅時間就行畢全程。講真，呢個時間，俾起我心目中嘅時間快咗唔少，所以今次嘅測試都幾滿意．．．你哋話呢？

　　今日喺苦行期間，亦不忘「隨影」，喺度同大家分享一下：

朝早寂靜嘅街道（當時大概七點）← →天星小輪嘅水手（每日靠哂佢哋）

龐大嘅船加高聳入雲嘅樓，相映成趣← →我「借啲意」為競步買返嚟嘅新跑鞋

↑不經不覺，中環對出沿岸已經填咗好多啦！↑

休息一天

2008-04-17T18:28:00.003+08:00

而家已經係夜晚嘅九點幾啦！今日工作超忙，一路都無時間去寫 blog ；咁都不特止，唔知點解，今朝鬼咁眼瞓，對眼好似唔識擘開咁～～～唉！咁嘅情況，再諗埋今日要做嘅工作，真係心情即刻低落哂！

　　於是乎，我就決定今日休息一天，唔去苦行～～點知，要喺公司做到無停手，直到夜晚九點幾先至走得！唉～～～我都係唔寫啦，唔係真係喺度瞓添呀！！！

遲起身

2008-04-16T08:28:00.003+08:00

今朝晨早六點醒咗，亦係我預計嘅時間，但係唔知點解，無啦啦又走去返瞓；到我正式起身嘅時候，已經係搭八喇！

　　見今朝遲咗起身，即時盤算緊今日要計時嘅路程應該揀邊豎好呢？

　　其實，尋日行嗰條橋都唔錯，如果由碼頭開始計起，至到歷山大廈接駁太子大廈嗰條橋，尋日喺網上地圖量過，應該無一公里都八百米，所以，一於搵呢條路嚟試一試！

　　船一泊岸，我就一馬當先咁～～其實，尋日放工我都係快速咁行呢度，不過係無計時之嘛！不過，唔知係咪近期見有機會就「練習」，所以今朝對腳好似有少少唔聽駛咁，去極都唔係好去得到！無計啦，咪慢慢嚟，睇吓可唔可以後期加速啦！

　　正如我估計一樣，行到中間咁上下，我就可以加速喇！一路行一路避開啲途人，係咁行係咁行～～～唔到一陣，終於到達太子大廈！望一望部 iPhone ，個計時顯示嘅結果係：07:25.2 。算係咁啦！不過，我覺得應該仲可以快啲添！

　　練習完畢，但係應屋企人要求，要去幫佢哋換本旅遊書～～～咦！弊！去邊豎換呢？無講喎！

　　就我自己都換過幾次嘅經驗，唯有先試中環港鐵站內嘅 7-11 先啦！

　　落到去，一如我所預料，係運哂吉嘅！咁就唯有去我嘅次選：和記大廈裡面嘅 OK 啦！

　　雖然我今次無揀錯，係應該去 OK 換嘅，但係好失望地係換哂無得換！不過，個店員好好人囉！佢同我講話咁啱先打過電話過去中環同上環嘅 OK check 過，應該有大概 10 本左右；而且，佢仲俾埋個電話我做 reference 添！咁就一於 lunch 嗰陣過去啦！

練習

2008-04-15T08:23:00.002+08:00

今朝雖然繼續苦行，但係就晏左起身，為咗想慳番啲時間，所以今日所選擇嘅路程同尋日一模一樣，只係巴士唔同咗（尋日搭 9 號，今日就啱啱有 7 號，平多幾毫子，嘻嘻）。

　　不過尋日就玩計時，計咗路程既開頭（即係由屋企至油麻地彌敦道），今朝就想唔同少少，所以決定係計搭完天星小輪之後，由中環７號碼頭落船嘅一刻開始，至公司之間既路程！

　　呢條路無乜特別，尤其當嗰條接駁天橋起好咗之後，由碼頭行到去太子大廈、再接過去渣打銀行為止，簡直就係一氣呵成，平坦至極，作為競步行路嘅練習路線，可謂適合不過；但係，一陣我唯一擔心嘅係，唔知路途中會唔會好多人呢？

　　喺呢一刻，我正正坐緊船過緊海，用緊部 iPhone 寫緊呢一篇 blog ；我而家都係要打點一切，準備開始我一陣嘅練習！

《後記：是次練習結果為 00:12:49.09 》

苦行日記．重新啟動

2008-04-14T08:34:00.003+08:00

經過數月嘅養尊處休，又攰、又唔夠瞓咁，而且又病咗成個幾月；另外，又喺尋日「借啲意」買咗對新跑鞋之後，今朝「的」起心肝走去「苦行」；雖然未行哂全程，只係由屋企起步，到油麻地港鐵站於彌敦道對面嘅巴士站為止（即係盤谷銀行對出），但係喺我計住時間底下咁行，只需九分半鐘就到達；我估計，只要我練習到可以均速咁行一公里，下星期嘅競步比賽應該唔難應付，最起碼嘅係，我仍然有信心走足全程，完成比賽先吖！

　　點解唔繼續行落去？我都諗過咁做，但係如果而家一開始就「谷」哂出嚟，一陣傷咗點算？諗深一層，都係逐少逐少咁增加好啲！

　　而家距離個比賽只有唔夠一個星期，希望我嘅策略成功啦！

無時間、無精神

2008-04-10T17:37:00.002+08:00

又無寫 blog 一日啦！尋日又係超超超忙，衰啲講句，真係連廁所都唔得閒去！

　　尋日忙足一日，返到屋企，又有另一惡耗！

　　「甘泉清盤．廉價航空神話破滅！」

　　好衰唔衰，阿爸阿媽本來同我去完台灣之後，就會開開心心咁去加拿大；而家，個旅程隨住個神話一切破滅！

　　而且，仲有一連串嘅問題衍生咗出嚟，要花時間一一咁解決！

　　另外，我又遇到事業上嘅另一個轉捩點，都一樣有好多嘢要返！

　　就係咁，我今朝就成九點先至返到公司，又要開始繁忙嘅一天喇！

無題

2008-04-08T08:24:00.002+08:00

唔覺唔覺，距離我要影相嘅時間逐漸逼近，今日開始嘅一個月後，就係影相之日，亦代表咗我嘅大 project 開始進入倒數階段！心情嘅複雜，真係唔知點去形容！

　　今朝，同樣地眼瞓，亦慣性地去咗搭隧巴，大約八點鬆啲就返到公司喇！我亦唔徙時間，一於繼續尋日嘅工作：為台灣之行搵資料！

闊別兩個工作天

2008-04-07T08:42:00.003+08:00

唔驚唔覺，原來上星期有兩日無寫到日記！無辦法，呢排無論在工在私，都係十分之忙碌；工事則有平日嘅 support work 加 PC upgrade ；私事就係要 plan 吓嚟緊下個月嘅「台北婚紗之旅．暨四大長老結伴同遊」！

　　講到個旅行，喺計劃行程確實令我費索思量！就上星期六，我同我女友用咗足足成個晏晝，終於 plan 好大半嘅行程，而家只係留返一啲問題要上網搵資料，例如啲地方嘅開放時間、火車嘅停站同開車時間等等，夾好之後，就可以話大功告成！

　　好啦！我都係唔講咁多住啦！我要去搵資料啦！

四月一日愚人節

2008-04-01T08:33:00.003+08:00

今日係 4 月 1 日愚人節！雖然今日都算係一個節日，可惜唔會有假期，所以今朝都係要如常咁返工、如常咁早起身！又因為今朝想洗頭，所以再早少少，六點鬆啲就起咗身喇！

　　大慨七點多就出咗門口。見有少少雨，都係決定搭車，但係又早咗出門口，所以就去咗搭 7 號巴士喇！

　　就喺過緊馬路之際，遠距離已經見有架車埋咗站。本來想話衝過去趕車，但係諗深一層：橫掂我仲有時間，都唔駛趕啦！於是我就施施然咁過埋條馬路喇！

　　不過奇怪嘅事發生咗喇！我越嚟越行得近個站，但係架車都仲未開喎！唔通佢咁好人，特登等埋我？

　　呢個時候，另外有位人兄，可能佢怕遲到啦，佢用咗 9 秒 9 嘅速度，向住架巴士衝埋去；正正喺呢個時候，我再望真啲，就有以下嘅情境：

　　當然，嗰位人兄埋到去，見無咗個司機，都發現架車壞咗啦！

　　雖然呢件明顯係一單突發嘅意外，不過又估唔到咁應節，真係差啲俾佢呃到添！

大塞車

2008-03-31T09:42:00.002+08:00

哥哥尋晚去完旅行返嚟（嚴格嚟講應該係今朝，因為佢差唔多成兩點先至返到），我哋成家人知佢無鎖匙，所以等埋佢至去瞓覺。就係因為咁，我就成三點至瞓，而家勁眼瞓！

　　不過，我亦特登今朝瞓多少少，晏啲先起身。七點起身擦牙洗面，食埋早餐，差唔多八點至出門口。

　　落到街，有啲雨粉，不過都唔理得佢咁多，遮都唔開咁繼續行去搭巴士。可能今朝真係比平時晏，所以架巴士一轉落公主道無耐就開始塞車；但係正如我之前提過，我因為眼瞓，所以一上車無耐我都開始閉目養神喇；不過，我今次就同平時有少少唔同，因為每次我醒咗之後就差唔多到站，但係今日到我醒咗，估唔到我仲係喺九龍未過海！！

　　咁我當然係乜都唔理繼續瞓啦！如是者「輪迴」咗幾次，終於都到咗胡忠大廈喇！呢個時候，我亦已經無咁眼瞓，所以今次都係無過站嘅！

　　到我正式返到公司埋到位，原來已經九點鐘喇！不過，正如老闆話齋：一次半次無問題，成日就唔好喇！

無氣

2008-03-28T09:50:00.002+08:00

今朝終極昏迷，仲差啲唔知醒添．．．唉．．．我而家其實都無乜氣，點解？咪仲係因為個病囉！

　　尋晚唔算早瞓，不過就 keep 住醒！其實，睇完中醫飲過中藥之後，嗰感覺已經好咗啲，條氣又順咗啲咁；但係而家就唔係經常咳，不過一咳就勁犀利嗰隻，尤其係夜晚，直頭就係可以咳醒！

　　所以，今朝無嚟神氣，一上到巴士就昏迷，返到公司又昏迷，甚至到而家，我都仲係可以二話不說就咁昏迷添！

「吽痘」

2008-03-27T09:04:00.002+08:00

尋晚套電視劇「古靈精探」發展得幾出人意表，正當睇到成個人「入」哂去之際，點知片尾曲響起．．．聽日（即係今晚）又約咗人唔返屋企吔飯，咁點算呢？？．．．唔緊要，只要有偉大嘅互聯網存在，我哋就有好多電視劇可以先睹為快喇！

　　可能因為咁，雖然今朝個鬧鐘好準時咁喺大約六點半就開工，不過我都係差不多七點先至起身，而且個人仲係有少少「吽痘」添！而呢個亦係我今朝選擇搭巴士嘅原因！

落雨天

2008-03-26T09:10:00.002+08:00

今日要做「講師」，但係份「講義」就啱啱尋晚先至做起，仲要係駁 VPN 返公司部電腦做添．．．點知一做就做都成兩點．．．所以，今朝都幾眼瞓！！！

　　一瞓醒，坐咗起身，聽到出面雨聲潺潺．．．終於今日都落雨啦！

　　我當然無去苦行啦！朝早食完苦媽媽嘅愛心早餐（真係感動，苦媽媽都病咗，但係仍然對我嘅照顧無微不至），跟住就出咗門口喇！不過，同尋日一樣，我都係搭巴士再轉船。

　　返到公司，做好哂「上堂」嘅準備，就開始寫我今日嘅苦行日記喇！

久遺了的維港

2008-03-25T08:23:00.004+08:00

今日係復活節假期過後嘅第一日，晨早起身返工嘅心情，我估每一個香港人都係大同小異；但係對於我嚟講，就多咗一個唔多好嘅意思：今日係我病咗之後踏入嘅第三個星期喇！！

　　雖然仲未病好，但係我今朝就早咗起身，想話睇吓有無時間去苦行一吓咁；始終因為要食完早餐再食藥，所以都係唔係好夠時間俾我全程苦行，但係就可以「半苦行」咁囉！

　　就係咁，我今朝就去咗搭 7 號巴士，去到尖沙咀碼頭，再搭船然後行吓嗰條好耐無行過嘅天橋，睇吓個填海工程嘅進度喇！

好耐無坐過嘅天星小輪

久違了嘅中環碼頭

　
無行一排，原來個海已經填咗咁多啦！

昏昏欲睡

2008-03-20T10:29:00.002+08:00

仍未有好轉！

　　唔同真係百日咳？？係就慘囉！

　　而家食咗藥，真係想乜都唔理，搵個旮旯「柄」埋就瞓！

　　無奈要繼續工作．．．唉．．．

再睇醫生

2008-03-19T11:38:00.002+08:00

尋晚見病情無乜好轉，所以再三去睇醫生。今次唔同嘅，係我叫醫生再重手啲，就算啲藥幾咁眼瞓都無所謂。

　　今朝食完苦媽媽嘅愛心早餐之後，就食藥飲藥水，跟住照例走去搭巴士。不過今次搭巴士就厲害囉！我一坐低就開始瞓，直頭就係進入昏迷狀態．．．

　　不過好好彩，今日好似平時咁，無過到站，不過今次就險咗少少喇！

無覺好瞓

2008-03-18T09:04:00.002+08:00

今日依舊係無行，走咗去搭車！

　　不過，我尋晚就真係無覺好瞓啦！成晚喺度咳！由兩點開始，差唔多一個鐘頭醒一次．．．所以，今朝喺巴士度又一次昏迷足全程！

　　但係，我點辛苦都唔及苦媽媽，佢半夜三點幾，失驚無神起身走去煲咗一碗薑湯俾我飲，仲話聽到我咳得咁辛苦，唔抵得咁話．．．

　　唉！我已經喊咗一轉o架啦（可以睇吓我個外傳有寫點解）！唔通苦媽媽真係要整喊多我一次？？好彩我當時超眼瞓，未及俾到反應；不過而家諗返起，個心都真係甜到落淚！

合皮巴夫地（上篇）

2008-03-17T16:05:00.004+08:00

上星期五晨早起咗身，諗住返工，但係病始終未好，所以最後都係攞咗一日病假去睇醫生喇！

　　今日個病都依然未好返，不過已經無咗嗰啲「四肢無力」嘅感覺喇！匆匆食咗苦媽媽嘅愛心早餐，再食埋藥跟手就出門口喇！見未好返哂，就當然係繼續去搭巴士啦！

　　返到公司，無乜特別，都係咁繼續做繼續做．．．終於等到食晏喇．．．發生乜嘢事？想知嘅話，一於去我個外傳發掘吓啦！

病假後第二日

2008-03-13T09:00:00.002+08:00

依舊係咁咳，雖然緩和咗唔少，但係狀態仍未見好轉！

　　今朝亦係「阿媽愛心早餐」，食完之後就食藥．．．不過今日好似個人狀態比尋日差，感覺目光呆滯、四肢無力，可能因為啲藥啩！！？？

　　仍然係去搭巴士，一上車安頓好之後，就全程昏迷．．．其間發生過乜嘢事，架巴士上過乜嘢人，我係一概唔知．．．好彩喺我差唔多到站之前，我突然醒過嚟，唔係可能要搭的士返轉頭喇！

病假後的第一天

2008-03-12T14:41:00.006+08:00

尋日終於都係頂唔住，請咗病假。休息咗一日，唔係話幫助好大，不過喺連日嚟嘅頻撲忙碌，終算叫做可以緩衝一下咁囉！

　　不過尋日朝，正係度諗緊返唔返工之際，望到個太陽超靚，忍唔住影咗幾幅相：

　　至於今朝，其實唔係好咗好多，不過假紙淨係寫咗一日，唯有頂硬上返工啦！不過，因為要食藥嘅關係，朝早就一定要食早餐喇！好彩，苦行僧有「苦媽媽」，佢不辭勞苦咁為我準備，等我喺病重嘅日子裡面都得到悉心嘅關懷！！！

病倒了，但仍要力撐．．．

2008-03-10T22:54:00.002+08:00

又再一次要到夜晚先至嚟寫 blog 啦！無辦法，實在太多嘢做啦！

　　其實我尋日已經開始作病o架啦！不過今朝喺公司預咗有單嘢要 complete ，如果唔係，我諗我到唔會話要「力撐」咁大鑊嘅！

　　不過講返我今朝，確實真係「四肢無力」，莫講話「苦行」，就算係我今朝去等巴士嘅時候，我連企都其實有少少力不從心、四面搖晃，單純係靠「意志力」先至不至於暈低！

　　捱到放工，本來仲想話去黃金買電腦嘢，但係終於不敵，要去睇醫生；而家食完飯兼食咗藥先好少少咁啦！

　　聽朝要睇睇情況先知返唔返到工喇！

遺失的一天

2008-03-07T20:42:00.002+08:00

雖然早一排終於成功申請美國簽證（仲已經寄咗嚟屋企添．．．成功攞咗十年），應該少咗啲嘢煩．．．點知唔係！！！只係一樣又一樣咁向住我湧埋嚟！

　　尋日終於又一次咁遺失咗一日！尋日成日都無時間嚟寫呢個 blog ！

　　主要原因簡述如下：晨咁早返到公司，開始又再準備今日嘅一單大壇嘢！一路做一路做，根本就無時間；時辰一到，又到返屋企嘅時候，尤其第二日有嘢要做，都係唔敢怠慢就返咗屋企休息。但係返到去，又到煩第二樣嘢嘅時間（而家暫時係煩緊 5 月去台灣要住邊豎）；一到時間，周公急 call ，就咁就瞓咗喇！

　　今日都係因為預咗有嘢要做，所以今朝行咗一半都走咗去搭車！返到 office 又即時開始打仗！做到而家差唔多 9 點先至叫做有少少時間寫吓嘢咁囉！

　　個肚而家已經打緊鼓，所以要停啦！睇吓有無時間、心情，再將以上嘅嘢係我外傳度再講啦！

獨力支撐

2008-03-05T22:40:00.003+08:00

今朝又遲咗成個鐘先至起身，不過就去咗搭 7 號巴士再轉船。

　　尋日個同事去咗剝智慧齒，所以牙醫寫咗三日假俾佢。

　　於是，喺我等緊巴士嘅時候，我同事就打電話俾我，話俾我知會攞多日假之餘，又講吓我尋日攞美國簽證嘅嘢．．．一路講一路講，我就返到公司咁滯喇！

　　不過，今日就同尋日有少少唔同．．．尋日我就成朝唔喺公司，所以都淨係得晏晝要獨力支撐；但係今日，我就要支撐足一日啦！

　　唉．．．

美國簽證

2008-03-04T19:41:00.002+08:00

終於到咗 3 月 4 號啦！

　　早幾個星期，為咗去個 friend 喺關島嘅婚禮，就決定去申請美國簽證（因為我唔係揸 BNO ，而且係由台灣出發）！

　　適逢其會，爸爸媽媽會去加拿大遊船河到美國，咁啱佢哋個簽證又過咗期，所以一氣過搞埋！

　　第一次搞，真係搞到谷住道氣！淨係填嗰四份表都填咗足足一個禮拜．．．又要搵返之前去過邊，又要填有乜親戚朋友喺美國，係差在未要填我三圍數字咋！

　　不過點都好，終於都到咗今日！

　　不過，今朝都仲係驚住有嘢漏，所以唔行，一早就搭巴士返咗公司，睇吓有啲乜嘢要準備，又或者要影印咁。

　　到咗 office hour ，撞正個拍檔病咗，啲嘢堆埋一大堆，又無人主動去理，又係唔知點解最後要我去搞！

　　算佢好彩，今日成功攞到個簽證，心情 OK ，咪幫吓手囉！

　　而家夜晚 7 點就嚟 8 點，寫埋個 blog ，再睇吓啲嘢搞點未，就可以返屋企「覺覺豬」喇！

撞車

2008-03-03T08:51:00.003+08:00

聽日就要去攞美國簽證，要去面談，即係我哋成日講嘅 Interview 。早幾日終於影咗啲相，所以諗住早啲返公司搞吓，順便印埋出嚟．．．嘻嘻，慳得就慳嘛！

　　要早啲返去，都係無乜邊個途徑快得過搭巴士喇！

　　其實，今朝遲咗半個鐘先起身．．．唔知點解，完完全全唔覺個鬧鐘響過，好彩阿媽入嚟嗌一嗌，唔係都唔知會瞓到幾時！

　　到出門口嘅時候，個走廊燈勁閃；落到樓下管理處咪同啲管理員講聲，跟住就向住巴士站進發喇！

　　喺巴士站，其實我有兩架都可以搭嘅： 103 同埋 113 。今朝未過馬路之際，就望住架 113 絕塵而去，不帶走一片雲彩！又好好彩咁，我等咗唔夠兩分鐘，有一架 103 就到咗喇！

　　一上咗車，遠距離就望都前面好多燈喺度勁閃．．．望真啲，原來有好多警車．．．噢！交通意外！

　

　　講真，我以前揸車嘅時後，已經覺得而家好多人都好妄顧交通安全，尤其一啲血氣方剛嘅後生仔女；意外嘅嘢，當然係無人想，尤其係搵食車如貨車、的士等等；所以，做人就好似揸車咁，有時忍讓一下，唔係淨係為咗人哋，好多時會係自己得益添！

無題

2008-02-29T09:30:00.003+08:00

呢排心情唔多好，好彩有未來老婆陪吓，如果唔係都唔知會變成點（可能已經發咗癲）！！

　　尋晚未來老婆費盡心力，終於叫做另我心情平靜返少少，但係今朝就大家都辛苦喇．．．我個鬧鐘依舊 5:55 就響，但係我對眼就好似擘唔開咁，唯有用絕招：瞓多一個鐘！七點度終於起咗身出門口喇！

　　不過，今日都係 resume 之前呢幾個禮拜嘅情形o架啦：一樣咁多嘢做，一樣要做一啲本來唔係我嘅嘢，一樣要繼續煩一啲未解決嘅嘢，一樣都係唔知做緊乜嘢！！！！

新船

2008-02-28T08:42:00.004+08:00

尋晚放工，同同事一齊搭船，去到尖沙咀碼頭嘅時候，見到海運大廈有一隻好大嘅遊輪。當時無帶相機喺身，唯有用部 iPhone 影低佢先：

　　其實，我當時親眼所見，同大家而家喺相度見到嘅真係有天壤之別！相中嘅船，其大小就好似我過往所影嘅差不多，但係，唔講你唔知，佢嘅船尾其實係長過海運大廈嘅！不過，最可惜都係無一部好啲嘅相機，唔可以影到佢嘅真面目！其後我同事訪尋過之後，先至佢個名叫「奧羅拉 Aurora 」。

　　今朝，如常咁行，去到尖沙咀碼頭，又見到另外一隻新船；咁即係意味著奧羅拉已經走咗喇！不過，為咗唔好失手勢，見到新船我都會為佢留倩影：
　

呢隻船叫做「 Amsterdam 」，顧名思義，係嚟自荷蘭嘅阿姆斯特丹；今次遠道而來到香港，唔知會留幾來呢？

斷纜．．．

2008-02-27T08:31:00.002+08:00

經過咗咁多日嘅苦行日記，本僧本著「有返工就有日記」嘅宗旨。不過尋日終於俾繁重嘅工作打破咗呢個宗旨啦！唉！

　　話說前日公司個電郵系統有少少問題，老細就叫我半夜接駁返公司 restart 一系列嘅 server 。須知道經 VPN 駁返去，就算用緊寬頻，但係加上唔同嘅配套，其實速度快極有限；所以我由 23:30 開始，一做就做到超過 1:00 ，再搞吓其他濕碎野，之後收埋部 laptop （因為我部電腦壞咗，所以要問阿哥借），都已經點幾兩點喇！

　　跟住到尋日朝，鬧鐘準時喺 5:55 響，咁我當然起唔到身，就只好將鬧鐘較遲多一個鐘再響；係七點幾我終於起左身喇！

　　比平日遲咗一個鐘先出門口，就當然係無行到啦！而且，搭緊巴士期間，我係無醒過添！哈！有好好彩咁，當我到站之前一刻，我突然扎醒，咁又唔駛過站喇！

　　好彩尋日下晝要出街做嘢，可以早少少放工返屋企唞下。尋晚食完飯之後，只係 21:xx 就瞓左喇；今朝準時 5:55 起咗身，大約 6:40 左右就出咗門口；忽發其想，就決定去搭 113 ，喺車上面開始寫呢篇嘢；現時 7:27 ，正身處蓮香，幫緊呢篇嘢埋尾喇！

鼠年第一次．．．

2008-02-25T09:09:00.002+08:00

今朝係鼠年開始到而家咁耐以嚟嘅第一次．．．

　　第一次好成功、無任何賴床時間而早起身（ ~6:00 ）．．．

　　第一次於「苦行」中沿途拍照（不過好多都係鬆、郁、矇，可以話係無一張可以見得人）．．．

　　第一次經過九龍公園．．．

　　最主要都係：第一次無受任何影響（如天氣、天嘅光亮度、自己本身嘅疲倦程度等等）而成功「苦行」！！！

半日

2008-02-22T09:03:00.002+08:00

今日要陪爸爸去覆診；早喺成個月前，哥哥已經問我有空與否，我當然亦義不容辭兼義無反顧啦。所以，今日只返半日，下晝就放工喇！

　　另一方面，最近工作量大增，而且亦有多方面兼顧：身處美國嘅朋友年底擺酒要幫手、連日來為美國簽證而煩惱嘅申請表兼其麻煩絕頂嘅手續（仲要一共四個人要申請）、自己於明年嘅婚禮籌備及其 gimmick 嘅項目‧．．所以，最近精神比較恍惚，就算係而家寫緊呢個 blog ，我都係喺 iPhone 度 draft 完，再返到公司用 Wifi send 到我個 e-mail account ，再由 e-mail 抄過嚟改嘅，驚住一陣無時間寫 blog ！

　　不過講返轉頭，我呢排都唔係咁精神，今日又一次搭車喇，所以先至有時間去 draft 定呢篇嘢咋！

攰．．．

2008-02-21T09:15:00.002+08:00

．．．攰．．．

　　尋晚開 OT ，成九點幾先至走，返到屋企，難為咗屋企人，因為佢哋點都要等埋我一齊食飯．．．所以，應該話尋晚無食晚飯，淨係食咗宵夜。

　　今朝出奇地六點鬆啲鐘就醒咗。坐咗起身，嘩．．．個身攰到唔識點講；過咗一陣，都係無辦法，唯有瞓多一陣．．．

　　未到七點，終於起身，不過超慢動作；如果平時，一定快手快腳就出咗門口，但係今日就唔同，直頭唔鬼理佢會唔會遲到添！

　　正因為攰，所以今日都唔會行，就去咗搭 113 ；落車時，望吓個鐘，先至 8:15 。再施施然去食個早餐，返到公司， 8:45 ，不過仲未齊人，唉．．．

再次啟「行」．．．不過．．．

2008-02-20T08:09:00.002+08:00

今朝都算幾早起身，大約 6:20 咁上緊啦！跟住去擦牙洗面換衫．．．見今朝比起之前真係無咁凍，所以其他啲衫就可以出動喇！最後，唔駛 7:00 就出門口喇！

　　落到街，感覺同之前早起身嘅日子好唔同．．．點解個天光哂嘅？唔係天矇光喎，係完完全全光哂嗰隻．．．不禁令我有一種會遲過平日嘅感覺，因為覺得好晏！於是攞個 iPhone 出嚟， check 吓平日 send 俾女友嗰啲短訊，睇吓之前天未光嘅日子，我係大概幾多點出門口嘅！望真啲，多數都係 7:0X 咁嘅時間就 send SMS 俾女友，亦代表我今日嘅時間其實應該同平日一樣，所以乜都唔理就起行喇！

　　行到去彌敦道，奇怪嘅情境令我嘅疑慮再次昇起：點解條彌敦道咁多人嘅？同平日真係好唔同，唔通我其實係遲咗？

　　喺種種嘅疑慮底下，再加上啱啱見到架 104 巴士，我就諗都唔諗，一躍而上；當時大概係 7:1X 。

　　無耐到達中銀大廈門口，落車之後，再望一望．．． 7:3X ．．．．．．暈．．．．．．

　　無嘢好講，只係得番一句：點解個天要呃我？？？

又一隻新遊輪

2008-02-19T08:51:00.003+08:00

今日經過尖沙咀碼頭，又有一隻未見過嘅船，所以影咗落嚟：

　　不過，呢隻遊輪唔算得好大，但係就好長！我用 iPhone 影嘅時候，就要影３張先至影得哂佢嘅全貌！

　　適逢其會，我今日借咗哥哥部相機嚟用，而佢係有個廣角嘅 28mm ，所以即刻攞嚟一試．．．哈，真吹脹，今勻廣角都唔夠，都要影兩張！

　　本來諗住話返到公司，搵 Photoshop 將上面兩張合埋變一張，不過影嘅時候，我搭緊天星小輪，而且係行緊，所以角度唔係好啱．．．而家將兩張貼哂出嚟，等大家可以想像一下佢嘅長度。

超忙．．．

2008-02-18T11:07:00.002+08:00

最近超多嘢要搞、要煩．．．幫個老友搞結婚嘅嘢（因為佢身在美國），又要同佢屋企人傾吓（唉！我都明白，自己屋企人講嘢係無咁「放」，因為做老豆嘅想個仔好，做仔嘅又想個老豆開心，搞搞吓兩頭唔到岸．．．呢啲時候，都係有個第三者出嚟，件事會 smooth 好多），而且佢仲要喺美國註冊，所以我哋呢啲做兄弟嘅又點可以缺席呢？咁嘅話，又要搞簽証．．．同時間，阿爸阿媽又會去美國，而個簽証又啱啱 expire 咗，咁我做仔嘅，搞開就當然係要幫佢哋搞埋啦！所以，近排上網「索料」嘅頻率超高；雖則話我屋企部電腦死咗，咁我咪借阿哥部 laptop 囉！一開就用咗幾個鐘，又係要成三點先瞓．．．結果係點，咪同上星期一樣囉！

　　唉！唔得，今晚要早啲瞓先得！！！

瞓過龍．．．

2008-02-15T09:30:00.002+08:00

5:55 ，鬧鐘又再響，但係尋晚又無用呼吸機、又夜瞓，所以把心一橫，將時間更改，索性 6:55 先至再算！

　　矇矓中，聽到「嘟嘟、嘟嘟、嘟嘟、嘟嘟」咁，一擘大眼，原來已經 7:30 ！

　　即刻起身，滾水淥腳咁「渣渣淋」搞點啲嘢出門口。落到街，心諗搭巴士又唔算慢，而且仲行少啲添（因為無論上車或落車，個站都好近），所以決定去搭 103 ；而唯一一個憂慮－－隧道口塞車，都唔算係一個好大嘅問題，起碼我 8:30 前已經返到公司坐低咗喇！

「華倫泰斯」日

2008-02-14T09:50:00.002+08:00

唔覺唔覺又過咗一年喇！仲記得一年前嘅今日，我正喺度籌備緊夜晚嘅「求婚大作戰」，仲搵埋一眾好友幫手添，務求令到女主角喺「聲淚俱下」嘅情況下，帶住感動嘅心情嚟完成我嘅心願！係呢度，我想再一次多謝嗰幾位好朋友佢哋嘅援手，令我嘅完美計劃更趨完美！

　　今日唔講咁多啦，因為又有嘢要準備．．．簡單一句：今日無行，因為尋晚眼瞓得滯，一瞓落床就瞓著咗，所以無帶「呼吸機」瞓，導致今朝有少少頭痛；不過，今日試新路線，去咗搭 113 ，喺中銀大廈落車，都係大約半個鐘就到，仲快過 103 少少咁囉！

　　好啦！講住咁多先，今日要放下晝，啲嘢所以好趕．．．

拜年後遺症

2008-02-13T09:05:00.000+08:00

本來想話搵個星期六去個 friend 屋企拜年，但係適逢嚟緊嗰個週末有婚展，又因為要幫個美國 friend 搵酒店酒席嘅資料，所以揀咗尋晚去。不過，尋晚放工之後先至去，要成八點幾先至到達，搞到人哋鬼咁夜先食晚飯，真真唔好意思！！！

　　就係咁，我同我女友就半夜至走．．．女友就仲放緊假，所以無乜所謂；但係我就慘囉！尋晚（今朝至真！）成點幾至返到屋企，仲要個電話尋晚無啦啦 hang 咗機，所以要搞埋至瞓得．．．

　　四點幾瞓，六點鬧鐘響，不過我就無醒到．．．直至六點四，終於俾個鬧鐘嘈醒，不過就好順手按咗個暫停制。未到七點，終於正正式式起身，比起平時瞓多咗一個鐘。

寒流攻心

2008-02-12T08:38:00.000+08:00

今朝氣溫攝氏九度，最高為十二度，濕度．．．應該係乾燥。

　　5:55 ，鬧鐘開始執行佢本身嘅責任。平日，大概響一至兩分鐘，我就會醒，然後按咗鬧鐘嘅暫停制，再瞓多約十多分鐘，鬧鐘會再度響起，跟住就會正式起身，擦牙洗面出門口；不過，今朝寒流攻心，就算坐咗起身，令我不禁要再度「捐」番入個被竇，好似驚住會凍僵咁，縮埋一舊。

　　掙扎咗一段時間，終於約 6:30 ，成功起床之後，快手快腳咁去擦牙洗面，然後再「捐」番入被竇度取暖．．．良久先至走番出嚟換衫出門口。

　　落到街，唔知點解，個身勁震；雖然今日著多咗衫，但係就好似一啲都唔暖咁！喺呢個時候，我暗地裡作咗一個決定：唔行啦！真係好鬼凍！今日都係搭車算啦！

　　不過，今日唔行歸唔行，都係唔想搭 103 咁「唔駛行」，所以，最後決定搭 7 號到尖沙咀碼頭轉船，再行一小段返工。一如以往，雖然今日都係遲咗少少，約 8:20 返到，但係都係一個人都無，由我開門。

大年初五

2008-02-11T08:17:00.000+08:00

恭喜發財！恭祝各位喺新嘅一年事事順境，想嗰樣有嗰樣！

　　今日係大年初五，亦係鼠年返工嘅第一日！過咗四日假期，食咗唔少年糕、蘿蔔糕等等嘅賀年食品；不過去嘅地方就比往年少咗喇！好似年初一就無去街，淨係女友嚟我屋企拜完年之後，送過佢落街；初二就去咗女友屋企，不過就出奇地無去睇煙花；初三去咗行山（詳記於苦行外傳）；初四就留喺屋企「煲」台劇；到今日就返工喇！

　　不過今朝就無苦行，反而陪咗老豆去飲早茶。本來諗住今日會八點半先返到公司，但係我飲完茶就去搭 104 ，唔駛八點就落車喇！亦一如以往，公司一個人都無；而我，亦開始我新一年嘅工作喇！

團年「茶」

2008-02-06T11:10:00.000+08:00

個標題係咪睇到好「Ｒ」頭呢？？

　　不過聰明嘅你，諗多兩諗一定估到箇中玄機嘅！

　　無錯，今日大年三十，所以決定暫停苦行，一於約埋個同事去蓮香，一齊嚟歎番個「團年『茶』」！

　　講真，我今朝食嘢嘅意欲唔係咁大，反而農曆新年前夕，好有 Holiday Mood ；再加上近排工作較忙，所以勁想好好咁歎番一下！

　　約咗個同事今朝 6:45 喺旺角站月台等；同爸爸一齊出門口，個天依舊未光，仲要仍係「黑齊」嗰隻！一路同爸爸講返佢去旅行嘅嘢，同埋今晚食團年飯．．．唔覺唔覺就到咗旺角站。

　　大約七點，我哋就到達中環站，唔駛搭半就到咗蓮香喇！

　　雖然今日無得早放，但係話哂聽日就放假，心情點都會好啲．．．加上我尋日就已經做好哂我手頭上嘅嘢，仲交哂「功課」添！唯一希望今日唔係太多嘢做啦！

超攰超眼瞓

2008-02-05T08:40:00.000+08:00

尋晚去咗女友屋企食團年飯，個盤菜真係好味到聽唔到口，不過，呢個話俾 10-12 人嘅盤菜，到最後我哋一共 10 個人都 KO 唔到佢，我女友仲攞咗個大湯碗出嚟載起啲餸，搞到好似剩返個細盤菜咁添！

　　食完大概十點度，過多一陣我都要急急腳走啦！一嚟今朝仲要返工，二嚟尋晚爸爸同家姐去完北海道返嚟，雖然唔駛去接機，但係就要去巴士站幫佢哋攞行李。

　　我最後十點九離開女友屋企，十一點二就到咗旺角，再行去信和個巴士站就十一點四未到；打俾家姐，話去到太子，再等多一陣就見佢哋喇！跟住返屋企，本來諗住等家姐稍稍執咗啲嘢之後再陪佢返過佢屋企，但係最後佢話唔駛，咁咪換衫沖涼瞓覺囉！不過都搞到成點幾兩點先有得瞓！

　　今朝一樣 5:55 個鬧鐘就響，賴吓床一陣，約 6:15 就起咗身喇！經尋晚一役都一早預咗今朝要搭車o架啦！哈！鬼整佢，等等吓架 7 號巴士到咗，我又諗都無諗就上咗車，咁咪唯有轉船囉！都咗尖沙咀碼頭，好似「故地重遊」咁，有好多新嘢．．．唉！好鬼攰啦！唔一一咁講啦！我手痕影咗啲相，一齊睇吓啦！

又係落雨天

2008-02-04T08:24:00.000+08:00

今朝如常咁早起身，諗住早啲出門口，所以「喳喳淋」擦牙洗面，大約六點九搞掂所有嘢出門口。

　　經過管理處，同管理員打聲招呼、講聲「早晨」之後，出到街，見啲人擔緊遮；不過我自己就唔係好覺落緊雨。想話乜都唔理，照行。

　　如常咁攞個電話出嚟， send 個 message 俾女友講聲早晨；正正 SMS 緊嘅時候，個螢幕突然有一滴滴水點，先知原來真係落緊雨。唉！同一個情況又再出現：天未光又落緊雨！睇真啲，雨勢好似會越嚟越大添！無奈底下，唯有去茶餐廳食個早餐，磨吓時間咁！

　　七點二食完個早餐，出到街見雨勢大咗，唔駛諗又係要去搭 103 ！約七點三、四度有車，而落車之時係大概半個鐘後，亦即係代表未到八點就返到 office 喇！最悲情係，諗住早一個站喺美利道（近遮打花園）落車，咁就唔駛怕淋雨（因為可以上天橋返去，有瓦遮頭），點知落車嘅時候，一滴水都無！等到同事返嚟，佢仲話一直都無落雨添！唉．．．

　　不過，一早返到嚟又無乜特別嘢做，所以稍稍執吓個檯面，都算係另一個得著啩（係少少咁囉）！

ZZZZZzzzzz.....

2008-02-01T08:50:00.000+08:00

尋晚同舊部門同事食團年飯，完咗都成十點。

　　今朝個鬧鐘照舊 5:55 響，但係因為尋晚夜瞓嘅關係，佢響咗成半個鐘我先至知道。

　　最後終於七點幾至正式起身！

　　於 7:30 出門口，乜都無諗，就帶住疲倦又眼瞓嘅身軀，就咗去等 103 。

　　大約八點，到站落車！

　　而家就喺公司度發住夢咁寫呢篇嘢！

「新」工作時間（四）

2008-01-31T08:51:00.000+08:00

「今日天氣寒冷，氣溫跌至 9 度．．．」

　　「記得著多件厚衫呀！仲有要襤頸巾呀，咪一陣凍鬼死你你就知！」

　　以上係電視嘅天氣報導員同埋我阿媽嘅對白！

　　不過，今日真係好鬼死凍；本來都無所謂，但係最煩就係啲雨！

　　今次嘅毛毛雨，我真係唔識點去形容．．．未出門口之前，望出街就見啲人無擔遮，又見個地幾乾，以為無落雨．．．但係落到街先發覺原來落緊，但係唔係咁易發覺囉！而佢落緊嘅密度唔係高，不過就好唔穩定，好似隨時會變大嗰隻（如果我個荷包係咁就好囉）！唉，都係唔好搏，就去搭車轉船算囉！

「新」工作時間（三）

2008-01-30T08:36:00.000+08:00

朝早天氣持續寒冷，氣溫得 13 至 14 度。

　　今朝出門口嘅時候，都係天未光，又有毛毛雨，不過，今日啲毛毛雨就係揼你唔濕嗰隻；見咁嘅情況，我就決定向油麻地進發，展開我「新工時」實施後嘅第一次苦行（最多沿住巴士線嚟行，落雨嘅話咪去搭車囉）！

　　不過，今朝真係超大霧，大家可以睇吓我嘅「傑作」：

　　另外，我今朝行過海運大廈地下嘅時候，先發覺原來嗰度係會落閘嘅！

「新」工作時間（二）

2008-01-29T08:02:00.000+08:00

今朝一樣晨早起身，鬧鐘依舊 5:55 響起，而我亦如平常咁翻瞓多一陣。可能因為今朝天氣特別凍，翻瞓嘅「潛力」特別強勁，要個鬧鐘響第三次我先至正式起到身，嗰陣大概 6:15 度啦！

　　到我出門口，喺玄關著緊鞋嘅時候，阿媽突然開咗條門罅問我：帶咗遮未呀？我不以為然，隨口答咗一句：帶咗啦！跟住就繼續著鞋喇！

　　我有啲奇怪，想轉身問阿媽：乜落緊雨咩？點知阿媽迅雷不及掩耳咁就閂咗門，聽唔到我個問題；而我亦繼續著鞋，然後出門口喇！

　　點知落到樓先知真係落緊雨，而最最最黑人憎嘅係落緊「毛毛雨」，即係揼你唔死但係又會揼濕你嗰隻！嗰陣時七點唔夠，天都未光，本來諗住苦行啲時間會好 fit ，但係而家咁落雨法，一陣揼病咗就真係唔慌唔苦喇！

　　咁嘅環境，突然好似盲頭烏蠅咁，唔知點算．．．天又未光，如果搭車返工，肯定超早到達！唉，唯有去撞吓附近間茶餐廳開咗未啦！好彩，雖然佢係開 7:00 ，但係佢未夠鐘就開咗，仲已經有兩個晨運客幫襯添！咁我咪入去食個早餐，磨吓時間囉！

　　食完早餐，大概 7:10 啦！出到街，唉！啲雨落大咗添！唯有冒雨衝過對面馬路，等到搭四度，就上咗 103 ；到 7:53 就喺香港公園落車喇！

　　返到公司樓下，撞到個舊部門嘅同事（即係一個綽號『阿叔』、得高望重嘅人物），佢見我咁早返到，仲問咗我一句：乜你瞓唔著呀？唉，我啱啱遇到嘅苦況，你又點會明白呢！？

　　上咗樓坐低咗之後，我就開始打我呢個 blog 喇！以為黑氣已過？哈！唔怕話你知，呢篇係我第二次打o架啦！個 blog 嘅 server 好似有問題，當我要發表嘅時候，佢彈咗 error 同我講話「發表失敗」．．．唉！！！！！！！！！無奈底下，唯有再打第二次喇！希望今日唔再黑啦！

「新」工作時間

2008-01-28T08:33:00.000+08:00

雖然未到農曆新年，但係今日都可以算係一個新嘅開始！點解咁講？當然係有因由啦！

　　話說我個同事突然好鬼死好學，乜鬼「自我增值」咁話，同佢啲 friend 走去報夜晚啲 course ；而我哋如果 keep 住放 18:40 ，雖然佢係喺灣仔返學，同我哋而家只係兩個港鐵站之隔，不過就一定趕唔到返 19:00 ！

　　佢有一日忽然問我：喂，如果我哋返工早番啲，你有無問題呀？

　　講真，俾在以前嘅話，我就一定會話：返早？咪傻啦！要早你自己早啦！

　　唔知點解，每每我返親啲工，初期我一定係會好早就返到，之後就開始變「準時」，到最後就梗係遲到收科！我自問並唔係一個好準時嘅人，但係我真係解釋唔到我自己個生理時鐘呢條 formula ！

　　不過，而家唔同講法啦！全靠「苦行」嘅關係，我習慣咗早起身，仲要係早過以前好多嗰隻，所以，對於我同事個問題，我當然係無意見啦！我只係同佢咁講：我無所謂，你想早番幾多都得，不過你記得幫我同老細講埋就得喇！

　　就係咁，我哋今日就變返好似以前咁喇！

　　另一方面，我亦較早咗個鬧鐘（5:55），再翻瞓到 6:07 就起咗身。天未光，有啲似去旅行 feel ！擦完牙洗完面，突然心血來潮，今朝就一支公去咗蓮香飲茶．．．七點半唔夠就到，八點二走人。今日啲點心出得比較慢，所以食得唔多，只得三籠，當中並無飽肚嘅大飽、盅飯或者馬拉糕；反而見到有糯米雞，不過阿姐點到無推過嚟就返咗入廚房喇，可能同佢有緣無份啦！

　　最後，以龜速返公司，搭半都未夠就到咗喇！

　　另外，因為今朝比較早出門口，所以天又未光哂，街燈又未熄；見咁「浪漫」，我亦忍唔住影咗啲相：

落雨天．．．

2008-01-25T11:33:00.000+08:00

今日一早起身，覺得凍到好似雪條咁～～～望一望落街．．．噢！落緊雨添～～～

　　無奈咁瞓返落床，最後同周公捉多兩盤棋之後，再起身望落街，見啲雨勢無改變過，索性今日再停一次苦行。

　　行到落街．．．嘩！好鬼死凍呀！行快兩步去搭車，期間正考慮緊究竟搭 7 號定係 103 ．．．如果 7 號，就仍然可以搭船，再行一段路返去；至於 103 ，如果落得大雨，可以早一個站喺美利道落車，淋兩秒雨就一路有瓦遮頭．．．因為有兩手準備，所以最後揀咗 103 ！

　　到落車時候，好彩無乜點落雨，於是就可以喺香港公園度落車，再行過對面就到咗美利大廈喇！返到上樓大概八點半，哈！竟然無人返到嚟，又係我最早喇！

無題

2008-01-24T08:31:00.000+08:00

今朝無乜特別，唯一係我個鬧鐘第一嘢「鬧」醒我嘅時候，即係 6:15 嘅時候，我對眼係攰到擘唔開，所以把心一橫，決定瞓多一個鐘，終於喺 7:05 醒咗兼起埋身喇！

　　正因為咁，我亦「順理成章」咁（其實係藉口，哈哈）無行到喇！搭咗 103 ，亦好快咁喺 8:21 返到公司喇！

曙光初露

2008-01-23T12:13:00.000+08:00

今朝精神奕奕，晨早六點半唔夠就起咗身喇！因為好想試吓飲咖啡食點心，所以都好早出門口，快快腳去咗佐敦嘅一個大排檔試一試（詳情可以參考我嘅【外傳】，喺「西部大開發」一文中有提及過），雖然唔係好似蓮香咁滋味，但係勝在夠新鮮，仲可以中西合壁添！

　　品嚐過後，再急急腳咁去搭船。過到中環，都係好似無乜嘢特別好寫．．．正喺呢個時候，我見到以下嘅情境：

　　呢幾朝行過都唔係好覺話有陽光，係今朝嘅陽光先至出現，仲要係「曙光初露」嗰隻！咁令我不期然聯想起最近個股市狂跌，尋日美國有關方面終於宣佈減息四分三厘．．．我其實就唔係好知有乜影響，但係聽我阿哥講咁係會令個市有機會升返喎！希望由今日開始，呢個「曙光初露」嘅消息，可以令到啲股民可以唔駛咁愁啦！

　　影完相之後繼續行，哈哈！突然發現有位小姐都係同我一樣影緊個「曙光初露」喎！唔知佢係咪又同我一樣諗埋同一樣嘢愛嚟寫佢自己個 Blog 呢！！

一齊做早操

2008-01-22T10:46:00.000+08:00

今朝好攰，無去行到，只係選擇咗搭車到尖沙咀碼頭。其實今日已經係特登晏啲出門口，唔知點解所有嘢都好似配合我一齊晏咁。去到碼頭，望過去海運大廈，出奇地唔見有任何船隻停泊喺度；點知上咗船之後，先見隻雙魚星號返緊嚟。

　　過到中環，行緊條長天橋嘅時候，經過填海區域，見到啲工人如常咁準備開工．．．咦，望真啲，點解佢哋排得咁整齊嘅？？

　　哈！原來佢哋每朝開工前係要一齊做早操o架！見到啲咁得意嘅情境，我忍唔住要 snap 一下！

「燒鬚」

2008-01-21T09:53:00.000+08:00

尋晚同朋友盡興完之後，完成埋個【外傳】，都成兩點鐘喇！話說上星期尾有啲嘢要喺今朝九點前搞掂，地點仲要唔喺 office 添，所以約咗個同事今朝七點鐘喺新世紀集合，「嘟」完「平兩蚊」再去搭港鐵，向上環蓮香進發！

　　點知，事情有驚人而巧合嘅發展。

　　一向對個鬧鐘收音機都信心十足，好多次都未試過誤點，而我相信經過今次事件之後，我嘅信心都依然爆棚！大家係咪以為我個鬧鐘收音機唔響呢？基本上佢唔係唔響，只係我見到嘅嘢係好不可思義！

　　我其實 set 咗 6:05 起身，但係我今朝唔覺有鬧鐘響過，不過我 6:48 嘅時候醒咗，擘大眼一望個鐘，嘩！ 12:48 ？？？？？？

　　無錯，就係個鐘唔知點解個時間唔啱喇！唉，呢個時候都唔考究咁多，直頭落床，第一件事就係去 send 個短信俾個同事，叫佢等一等我，話我個鐘壞咗，啱啱先至起身；然後滾水漉腳咁去擦牙洗面換衫，再睇返個電話，先望到個同事都 send 咗個短信俾我：「 Me too ！」呼！而家先叫做定返啲，唔駛咁趕！

　　本來諗住今朝好「他調」咁去蓮香飲茶，最後轉咗去新世紀大快活食早餐，到尾都趕得切去完成今朝個 task ；就係咁，所以今朝無行到，亦過咗驚險嘅一朝早！

凍．．．痛！！！

2008-01-18T08:36:00.000+08:00

今朝天氣持續寒冷，令到我喺溫暖嘅被竇入面都唔係好願出嚟，所以今朝差唔多成七點先至肯正正式式坐咗起身。

　　落床之際，腳踝內則突然隱隱作痛．．．其實呢幾日周圍「撲」，一早已經覺得隻腳有少少異樣，只係顧住忙無乜點理佢啫；今日終於先叫做忙完（正唔正式完就唔知，需知天下間有一事叫突發），個人一鬆，啲病痛就好似出晒嚟咁，尤其而家天寒地凍，嗰少少痛楚會令你覺得份外淒涼。

　　就係因為咁，喺我洗面嗰一刻就已經決定咗，今朝要唞一唞，走去搭車。

　　咁要搭乜嘢車呢？

　　其實，要搭車都可以好多條路線： 103 直到香港公園（則係寫字樓對面）、 7 號到尖沙咀碼頭轉船、火車到紅磡站漫步尖東海旁（或尖東站出再轉船）、7B 到紅磡碼頭轉船（呢條路線從未試過）、港鐵旺角站直到中環。

　　落到街，就喺過馬路嘅時候，眼前嘅情境已經幫我作好選擇．．．我作好準備，冒衝紅燈之險，向住巴士站直跑．．．剛剛好，我係最後一個上呢架 103 ！

　　可能因為天氣關係，再加上我其實都唔係好夠瞓，所以一坐低就「進入狀態」喇！返到嚟寫字樓，都只不過係 8:10 ；就係咁，新嘅一日又開始喇！

出 Site 做嘢

2008-01-17T14:36:00.000+08:00

呢排幫手做緊個大 Project ，係講文物保育嘅。咁我就緊係負責一啲最無關痛癢嘅嘢啦！咪就係預備啲 laptop 去做 Kiosk 囉！先唔講咁做法有幾無稽，總之啲機要俾公眾用嘅，咁就梗係要限制部機啲嘢啦！要喺 Windows XP set 啲 Group Policy ，其實係一樣好繁複嘅嘢，我亦唔打算喺呢度講！

　　不過，呢個 Project 造就咗我今朝可以遲啲起身。

　　話說搞 function 嗰間公司今朝要搞個 road show ，部 Kiosk 係佢哋自己預備嘅。不過話晒都係同我哋個 project 有關，所以佢哋問可唔可以搵個 I.T. 同事嚟稍為跟一跟。好順理成章咁，我今朝就要去海運大廈返工喇！

　　八點起身，過咗搭半先出門口。如常咁行，但係今次就經過油麻地果欄，仲影咗幾張相添！

　　油麻地果欄原來朝早係好熱鬧o架！嗰度有好多人揀生果同埋叫賣，周圍嘅環境同平時係完全唔同，別有一番滋味！

　　過咗果欄繼續行，去到港景峰，食咗少少嘢（係呀，今朝唔知做乜鬼好鬼死肚餓，而今朝又要喺出面做嘢，唔知幾時先完，所以都係去食啲嘢充吓饑囉），然後就去咗海運大廈喇！

　　過咗十一點，去天星碼頭返公司嘅時候，又見到隻新船（其實應該唔係新嘅，不過我就未喺香港見過囉）！

新路線

2008-01-16T10:20:00.000+08:00

經過咗一晚嘅休息，今朝又一齊如常喇！

　　今日，本來無話特別想行邊條路，純粹隨心咁去行。當去到油麻地永星里，我就轉咗入去上海街繼續行；然而，去到入境事務處（西九龍辦事處）嘅時候，嗰度就仍然係咁多人。

　　其實嗰度每日都好多人排隊，而我亦唔係第一次見o架喇！不過，今日有啲好得意嘅情況．．．話說啲人真係「倒塔」咁早就去排隊，所以大部分人都帶晒「架生」去排。突然間，有一位清潔工人要掃街，啲人就好似狂風掃落葉咁四散，但係「架生」齊全嘅人就「朋能」咗啲啦！當其時嘅情況，可以用一個字嚟形容：亂！

　　之後行到去唔記得係北海街定係西貢街，望入去，見到傳聞中嘅「金山樓」！

　　呢間酒樓，雖然無蓮香、陸羽嗰啲咁歷史悠久，但係都可以話係舊式茶樓中數一數二嘅名牌。仲記得細個嘅時候，爸爸就成日都買呢度嘅「馬仔」返屋企食，佢個種鬆化，加上椰絲嘅香甜，真係諗起都想即刻食！好可惜呢間酒樓已經「執咗」，如果唔係，我諗我可能會成為佢嘅常客之一！

眼矇矇．．．

2008-01-15T11:26:00.000+08:00

今日個 topic ，係要嚟形容我而家嘅狀態嘅！無錯，我對眼除咗矇矇地之外，個意識都係矇矇地．．．唉！今日仲要出 site 添！都唔知下晝點捱！！！

　　尋晚因為夜瞓，所以今朝就好「霖」咁，仲差啲唔識起身添！「責」醒之後，望一望個鐘，嘩！已經成七點喇！個頭仲係「發發」下咁．．．於是，我做咗一個好重要嘅決定：今朝唔行，要搭車！

　　就係咁，為咗唞足精神，我去咗搭 103 巴士。原本諗住沿途瞓吓覺，但係攞咗份 am730 ，煲晒成份之後，已經到咗灣仔喇！同時間，我見個車頭玻璃有啲水點．．．望真啲，原來落緊雨！心諗：好彩，今日嘅決定都係無錯，如果勉強自己去行，之後做嘢一定好辛苦之餘，仲要做埋落湯雞添！

　　所以有時啲嘢真係講唔埋o架！有時有啲嘢，唔係話你想點就點。好似今朝咁，我又覺得好似冥冥中有主宰咁囉！不過，我今次好肯定我唔係話要搵藉口，所以我鐵定聽日一定會再度苦行嘅！

天氣轉寒

2008-01-15T01:34:00.000+08:00

今朝天氣寒冷，天文台話氣溫得 14 度，所以我都著多咗件衫，唔知大家又有無凍親呢？

　　雖然有苦行，但係喺我要寫苦行日記之前，要幫爸爸印返張靚相，皆因佢又去日本啦！佢話要俾返張相個日本人喎！

　　之後想話開始寫啦，哈！點知又要做其他嘢。老細叫到，無計！

　　一做就無停，仲連飯都無食添！

　　做好之後又要同老細一齊出 site ，又係無停！直至五點先由尖沙咀走得．．．咁晏就梗係無返公司啦！

　　到而家成七點，因為約咗未來老婆去街街，所以用住部 iPhone 寫住呢個「依貓」先，等有機會先至抄返落嚟囉（即係而家啦，哈哈）！

　　唔講啦！老婆等食飯！係咁先！

休息？？休克？？

2008-01-11T17:17:00.000+08:00

已經好幾日啦！

　　唔係講苦行，亦唔係講啲乜嘢失敗之類！！

　　見我咁晏先寫 blog ，梗係又同做嘢有關啦！！！

　　都係嗰句～～人哋簡單一句，你就做死十年！！！！

　　仲要係做完之後，功就佢攞，鑊就你孭！！！！！

　　尋日仲要係最最最最最激氣嘅一日添！！！！！！

　　谷住道氣，直到今朝！！！！！！！

　　咁啱個同事喺禮拜頭已經開始約我去蓮香飲茶；本來都仲諗緊去唔去．．．但係做嘢做到咁！！！！！！！！

　　辛苦「十年」，總要搵返一日輕鬆吓啩！！！！！！！！！

　　而且，今日仲要係咁嘅天氣添！！！！！！！！！！

真係好早起身o架！你睇，街燈都未熄呀！

朗豪坊唔見咗呀！

純影集 2008/01/10

2008-01-10T10:24:00.000+08:00

今日天氣真係好一般，天文台仲話有機會落雨添！！好彩，今日苦行一路都涼風颯爽兼無雨，不過係天陰陰咁囉！

　　縱使係咁，我仍然不忘用我部新玩具去 snap 咗啲相！今日一於嚟一個純影集啦！

終於．．．

2008-01-09T08:53:00.000+08:00

尋晚大約十一點左右就走咗上床瞓喇，咁當然唔係即刻瞓得著嗰隻啦！我諗大概十二點度瞓著啦！

　　仲驚住仍然會唔夠瞓添！

　　今朝，個鬧鐘好準時咁喺六點三就響喇！咁我咪按佢個「翻響」制～～即係喺一定時間之後會再響多鑊嗰個呢～～咁如是者做過兩次之後，大約六點半我就起咗身啦！

　　咁早起身，無理由行唔到啦啩！！！

　　不過，今朝雖然有苦行，但係，再一次，都係無乜特別嘢好寫！

　　攞住部 iPhone ，本來都 snapshot 咗幾張相嘅～～廣華醫院街診嘅人龍、彌敦道晨早嘅寂靜、滿街莘莘學子返學嘅情境．．．好可惜，可能係我唔係好慣用電話影相嘅關係（講起都失禮，呢部係我嘅第一部可以影相嘅電話），大部份都影到鬆、郁、矇，簡直就係難登大雅之堂！

　　較為好睇少少嘅，睇怕都係得番左邊呢張喇！

　　等我好好咁熟習吓部 iPhone 先，希望下次可以影多啲沿途情境嚟同大家分享一下！

再一次失策．．．

2008-01-08T18:18:00.000+08:00

唔覺唔覺又過咗下晝六點，又係放工嘅時候喇！做足一日，而家先叫做有時間嚟寫一寫、記一記！

　　其實，今日都唔係話有啲乜嘢值得寫；最主要嘅原因，係因為我今日又無行到啦！！！

　　尋晚去完街，返到屋企，部 iPhone 無啦啦無晒顯示，按乜制都完全無反應！心諗：唔係咁邪吓話！個 friend 幫我喺美國帶返嚟，今朝先至話走咗，咁就即刻壞？？仲要喺我啱啱為咗佢而買咗個新 router 先至嚟壞？？

　　唉！心急如焚之下，我唯有借阿哥部 laptop ，係度猛試猛試．．．終於，俾我好彩試到開得返！！個心真係怯咗幾怯！！

　　不過，跟住帶嚟嘅後果，今朝就顯現咗出嚟啦！我起身時望一望個鐘～～～ 7:45AM ！！！唉～～～

　　唯有寄望聽日啦！！！！！

繼續苦行．．．

2008-01-07T09:31:00.000+08:00

新一年終於都「正式」開始啦！點解講「正式」？因為今個月內打後嘅日子都無紅色（除咗星期日）！即係意味住今個月都唔會有假放囉！咁咪即係又係要「日日做到無停手」囉！

　　雖則話係新嘅一年，但係今朝就真係「平平無奇」啦！沿途好努力咁留意週圍嘅事與物，但係就偏偏無乜特別嘢值得記、值得寫！

　　終於，去到尖沙咀碼頭嘅時候，就見到一隻以前未見過嘅船泊咗喺度！

　　睇個船名「Deutschland」，佢應該係由德國過嚟嘅！

　　其實我成日將「Deutsche」同埋「Dutch」混淆，所以初時我都未敢肯定佢係由邊豎嚟嘅！但係經過我上網「查清楚」之後，就有以下嘅結果：

「Deutschland」這個字是德文，不是英文，它的意思就是德國。在德文中「land」是指國家，而「Deutsch」的意思是「德意志的」(「Deutsch」也可解作「德文」)；所以「Deutschland」的意思就是「德意志的國家」，即我們所認識的那個德國。

「Dutch」係荷蘭文/荷蘭人，「The Netherlands」是荷蘭的正式英文官方名稱（荷蘭文：Nederland），意即低地，皆因荷蘭大部份國土位處低地之故。

身體真的弱了．．．

2008-01-04T08:56:00.000+08:00

尋日我朋友同我講：睇你個「苦行日記」，都好似好耐無行囉喎，要中斷呀？

　　當時，我無言以對！

　　今朝，鬧鐘如常 6:25 就執行佢嘅工作；奈何冷空氣迫使我要鑽入被窩裡掙扎，直至 7:10 ！

　　擘大對眼，坐咗起身，再望一望個鐘～～～唉！！！！！！！

　　今日，又係另一個失敗！

　　搭住 103 號巴士，沿途無留意身邊任何事物，只知嗰一刻係極度需要安逸的一覺！

　　唔覺唔覺，真係瞓著咗．．．．．．突然一下扎醒，好彩仲未過站！

　　到咗呢一刻，我先知道：身體真的弱了！！

　　食埋今日藥，今晚早啲瞓，再加埋嚟緊兩日嘅週末假期，要休息返夠本！！！

　　一於下星期，再戰「苦行日記」！！！

病倒了

2008-01-03T12:05:00.000+08:00

估唔到喺２００８年嘅第一個工作天，我要請病假！！！

　　其實元旦日嘅時候，我已經唔係好妥；但係因為要幫朋友揀結婚相（即係要猛咁幫佢 cut 相，直到 package 內所包含數量為止），所以都仍然「頂硬上」。之後夜晚約咗個「美國友」（外傳有提過。如果都仲係睇到一頭霧水嘅話，可以到 http://hk.myblog.yahoo.com/walkalone-twt 參詳參詳）去睇戲，所以更加要「頂硬上」！可能就係咁，我就傷風流鼻水喇！

　　第二朝（即係尋日）起身腳步浮浮，唯有請一日病假啦！

　　到咗今朝，個感覺雖然好咗好多，但係個人仲係唔知點咁；當然，請多一日病假就梗係 very good 啦！但係，都要賺錢食飯嘅，所以都係起咗身返工喇！

　　不過，今日唔行囉！咪一陣瞓咗喺街度點算！！！

　　希望聽朝好好多啦！最好就係好返晒啦！

大除夕０７’

2007-12-31T11:52:00.000+08:00

今日係２００７年１２月３１號，即係今年嘅最後一日，亦即係大家所認知嘅大除夕。

　　最近都無行好耐，見今日無乜特別要趕返去嘅理由，所以再一次展開我嘅「苦行」。

　　不過今日天氣超凍，天文台仲發出今年嘅第一個寒冷警告～～喺今年嘅最後一日，發出咗今年第一個警告！

　　但係我就一於懶理，仍然大無畏咁响寒冷警告底下向尖沙咀方向行！

　　行到去差唔多佐敦，我「凍」嘅感覺都已經一掃而空！

　　去到尖沙咀碼頭，如常咁攞咗份「都市日報」，跟住就去搭船喇！

　　講真，今日著實無乜 mood 做嘢，所以返到公司，即刻同老闆攞咗下晝 time-off ！

　　今晚一於一齊迎接２００８！

唉！瘋！

2007-12-28T10:45:00.000+08:00

今朝再一次無行，唔係因為啲乜，只係為咗部新電話～ Apple iPhone ！

　　個朋友上星期六喺美國帶返嚟，我玩咗幾日，但係因為新得滯，所以電話嗰部分仲未解到鎖（所有新買嘅 iPhone 因為 Bootloader 係 4.6 嘅關係～即係所謂內置嘅 Firmware 係 Version 1.1.2 ）！無計底下，唯有當係 iPod Touch 用住先！

　　尋晚放工，終於疊埋心水，去咗先達買咗張叫 TurboSIM 嘅 IC Card ，話新機都可以用得到所有功能。

　　返到屋企，部爛鬼電腦唔生性，壞鬼咗，搞到我部新玩具唔上唔落！

　　無計，唯一方法係返公司用公司部電腦！

　　就係咁，今朝超早起身，超早出門口，超早返到公司！

　　從來未試過！ 7:45AM ！真係拜神都無咁神心！

　　返到公司，當然係無人啦！正！可以靜靜咁搞我部 iPhone ！

　　不過，搞到而家成十一點（當然中途有做吓公司嘢），都係仲未得！

　　唉！瘋！真係搞到人都癲！

　　最多今晚再去先達，補多兩舊搵人搞！

　　但係，真係唔忿氣！好！整多次唔得先算！

　　繼續努力！

聖誕之後．．．

2007-12-27T08:33:00.000+08:00

三日前嘅平安夜，係繼續要返工嘅日子。仲記得當日，眼見同事們一個一個咁喺我面前離開，最後仲要得返我一個人無得早走，嗰種辛酸，非筆墨所能形容！終於等到放工，先叫做有返少少嘅安慰，叫做有放假嘅心情！不過而家，我又要返到公司開始沉悶嘅工作，個同事仲要放埋假．．．唉！嚟緊幾日，真係不敢想像！！！

　　尋日難得約齊人腳，終於可以行到山，所以選擇咗一條比較長嘅路線，詳情會喺【外傳】交代。

　　行完山嘅今朝，隻腳好似「死咗」咁，都唔知係因為太耐無行，定係真係自己老咗！

　　無可奈何之下，決定再一次違反「苦行」手則，去咗搭巴士再轉船！

　　不過喺等巴士其間，見對面線有一架私家車同的士撞咗；本來都唔係真係話好大件事．．．起碼無人受傷先！不過，個場面就真係超墟堪！！！

　　撞車只係涉及兩車嘅司機，無其他乘客；但係處理呢件事嘅警察，就超過十個！！！

　　而車輛就有兩架撞咗嘅車、一架衝鋒車、同埋一堆警隊嘅電單車．．．而中途仲繼續有電單車加入．．．咁當然唔係普通嘅電單車啦！

　　其他人就唔知，我就真係睇到「Ｒ」晒頭喇！

　　我當兩個騎警一對一咁同兩位「當事人」落口供，一個負責交通疏導，衝鋒車（當有５個警察先）要控制情況，再加多一個騎警執頭執尾兼做聯絡，咁都係頂到盡九個警察啫！我真係唔明第十個打後嗰啲喺度做乜？？？

　　睇睇吓，巴士到站，我就帶住我嘅疑問上車；從此，呢個疑問變成一個．．．謎！！！

一個濕笠笠嘅早上

2007-12-24T08:38:00.000+08:00

尋晚出完街送女友搭車嘅時候，失驚無神落起雨上嚟。諗住呢啲咁嘅「失暈雨」第二朝會無o架啦！哈！點知今朝一早起身，聽到個冷氣機喺度「叮叮咚咚」咁響；再望出條街．．．唉！仲係落緊雨添！！！！

　　一如以往，我繼續起身擦牙洗面飲鮮奶（高鈣低脂嗰隻），見仲有少少時間，就開電腦搞吓部新買嘅 iPhone ．．．特登「磨」多一陣，諗住會無雨啦！點知仲係見啲人担緊遮，又見個鐘都成七點四個幾字；另一方面，個 iPhone 好似比想像中難搞，於是我就下定決心，換好衫走人！

　　落到街，見啲人仲係担住把遮，但其實當其時只係得啲雨粉，應該係開始停雨無耐。我見個天又唔係咁光，又唔知佢會唔會突然傾盤大雨，咁我咪下定決心，要去搭 103 巴士囉！

　　未到個站嘅時候，遠距離望都有架 103 ，oh no！！！我仲未過馬路．．．等埋呀．．．．

　　咁當然架車唔會等我啦！咁我就唯有垂頭喪氣咁埋去等囉！

　　好彩，原來朝早嘅 103 都 OK 密o架！我等咗大概 5 分鐘度，我就可以上車啦！

　　八點三未到，我就返到公司；跟住，我就要同部 iPhone 搏鬥喇！

　　有關部 iPhone ，有幸嘅話，我會响【外傳】詳述，請密切留意！

無奈

2007-12-21T11:39:00.000+08:00

而家已經係夜晚嘅九點五十三分，離我今朝「應該」苦行嘅時間已經過咗成十幾個鐘喇！咁點解會咁夜先至嚟呢度寫嘢呢？當然係因為今日嘅工作超多啦！話實，真係差啲做死咁滯！

　　講返今朝，又點解會話「『應該』苦行」呢？咁當然係我今日無行度啦！

　　其實，主要係因為我晏晝會無飯食（熟識我嘅朋友就知我平日食晏晝飯係响公司啲阿姐度搭食嘅！真係慳好多o架！！！而今次無飯食係因為所有阿姐今日有聚餐），所以我係「有預謀地」早一晚就約同事喇！去邊？咪去蓮香飲茶囉！

　　講到飲茶，我今次係第三次喇！而對上兩次食嘅雖然唔多，但係就可以頂到一日！

　　亦好彩我今朝有咁嘅舉動，唔係好似今日咁繁忙，做到死咁，就真係好唔抵啦！！！！話晒，朝早都叫做「他調」過吖！

　　最後，我就好正式咁同大家講一句：苦行日記，是日休息！！！！

又有新遊輪

2007-12-20T08:32:00.000+08:00

　　今朝如常咁去搭天星小輪，望出個海度，見都架「寶瓶星號」啱啱返緊嚟。佢喺維港中心，就好似一隻龐然巨物咁，向住海運大廈方向進發。

　　而佢嘅「姊妹」遊輪～「雙魚星號」，就一早已經泊咗埋岸喇！

　　同一時間，我發然另一隻遊輪係我未見過嘅！就係下面呢架喇！

　　突然間，我個腦浮現咗一個問題：究竟香港每個月有幾多外地遊輪入境呢？淨係呢個月，我已經見到成三隻咁多～～咁，又會有幾多遊客入境呢？

　　跟住，我所諗嘅嘢再高多咗一層：如果我係遊客，去到人哋嘅地方，又會點呢？又如果我要從海出發，又去邊豎好呢？

　　最後，我嘅問題一再提昇，直頭到咗極點：究竟，我幾時先可以放假同埋有錢去旅行呢？？？．．．．．

　　之後，隻天星小輪就埋咗岸喇！忙碌嘅一日，咁就開始咗喇！

昏迷

2007-12-19T13:25:00.000+08:00

今朝大概六點半，個鬧鐘好有責任咁係度響，但係我就好似完全無瞓過覺咁，連眼都唔係好擘得大！好彩我較咗兩個鬧鐘，而佢哋都係嗰啲唔按啱嗰個掣就會每隔五分鐘響一次，所以我就選擇繼續瞓～～唔係，應該係我根本起唔到身，個身體完全唔受我控制咁～～終於到咗六點十，我可以控制返自己個身體喇！

　　不過，我由擦牙到洗面，都係好似隻手「自動化」咁；到我換埋衫褲鞋襪，飲杯奶就出咗門口喇！

　　到咗條街之後，覺得自己又再開始不受控制，所以去咗搭巴士喇！一上到車，二話不說上咗上層搵咗個位即刻瞓，途中雖然係瞓唔「霖」，不過真係無醒過！跟住去搭天星小輪上層（貪佢朝早無乜人），就見到海運大廈停泊咗隻遊輪未見過：

　　隻船就無乜特別，不過因為未見過，同埋俾佢個名吸引咗！！ ScholarSHIP 喎！有邊個讀書嘅時候唔想要呀？而家唔怕啦！以前無攞過 scholarship 嘅話，而家都可以坐返夠本；不過大前題係：你要好有米！！！

　　雖然有隻咁過癮嘅船，但係我「昏迷」嘅感覺一啲都無減退，反而有所增加！！！咁我咪「發行對腳」，高速咁返到公司，都係八點半未夠。好！一於眠一眠先．．．就係咁，我就正式進入昏迷狀態．．．直到九點半，昏迷感覺漸漸消散，先至開始今日嘅工作！！！

耐人尋味

2007-12-18T11:29:00.000+08:00

大家有無睇過「老夫子」？講真，我覺得老夫子同埋牛仔係香港漫畫史上最具代表性嘅人物！（真係要多謝王澤同埋王司馬兩位老師！）

　　點解無啦啦講老夫子？心水清嘅你同埋妳一定會估到同今日個題目有關喇！

　　「耐人尋味」，的確係「老夫子」入面用得最多嘅題目。適逢其會，今日嘅我的確係比較耐人尋味．．．

　　最耐人尋味嘅，就係起身嗰下！當我擘大對眼之際，一望．．．嘩！七點半啦！！！

　　好耐人尋味咁諗返之前一晚，同朋友食飯（仲要收到炸彈俾佢炸到遍體鱗傷添．．．個荷苞）；席間同朋友暢飲，然後就「wing」住返屋企喇！跟住發生乜嘢事，都唔係好記得添！

　　諗完一輪之後，就「喳喳臨」起身擦牙洗面換衫換褲飲杯奶再孭袋走人，已經成八點．．．呢個時候，我個腦又好耐人尋味咁出現咗一句：今日苦行告吹！

　　最後，我就耐人尋味咁行去新世紀「嘟」兩蚊再行去旺角站搭港鐵返工喇！

ZzzZzzZzzZzzZzzzzzzz......

2007-12-17T08:37:00.000+08:00

尋晚做冬，叫埋女友嚟屋企食飯，之後行咗一陣街，再送佢走。返到屋企，過咗半夜，寫埋個外傳之後（斷斷續續咁寫咗好耐，因為部電腦瓜瓜哋，無計），都成兩點喇！「咋咋臨」瞓覺，今朝阿爸阿媽去澳門，一早起身，整裝待發之時，難免會「傾鈴鯁欄」，所以我未天光就起咗身喇（大概六點四、五度啦）！

　　正因為咁，我而家個腦「實晒」，諗唔到嘢；唯有用相片代替，最多加少少描述，敬請原諒！

今朝嘅維港同我一樣，都係矇矇矓矓


呢隻就係我成日搭嘅天星小輪喇！想開船之際，咁啱雙魚星號歸航，所以要讓一讓喇！

嘩！好快呀！唔知阿爸阿媽係咪喺呢隻船上面呢？？

啲漁民真係好勤力，但係茫茫大海裡面，佢哋淨係得隻艇仔，真係戥佢「牙煙」！

就好似圖中所示，上面係維港經常見到，其中四棟唔同年代嘅摩天大樓，由左至右分別係：中環怡和大廈、中環中銀大廈、灣仔中環廣場、中環國際金融中心（二期）